EDITORYAL - Prayoridad sab sa bakuna

Nagkadaghang mga lokal nga mga opisyales ang nangatakboyan og coronavirus ning nanglabay nga mga buwan, ang uban kanila nga aduna nay daang mga balatian gilupig gyud sa maong virus.Mao nga daghan na ang mga nanawagan nga maapil sila sa prayoridad sa bakuna sa Covid-19.

Dili ikalimod nga ang local officials tungod sa ilang trabaho makonsiderar gyud silang frontliners kay nabutang sa risgo ang ilang panglawas kada adlaw.

Pipila ka semana na ang nakalabay sa dihang dunay mga mayor nga gipaubos sa imbestigasyong administratiba sa Department of Interior and Local Government tungod kay nag-una una sila sa pagpabakuna ug nakigdungan sa mga medical health workers.

Base sa guidelines sa vaccination effort sa gobiyerno mao gyu'y prayoridad isip medical fronliners kay sila maoy taas og exposure sa Covid-19.  Apan dili mabasol ang mga LGU officials tungod kay bisan tuod dili sila medical fronliners, exposed man gihapon sila sa daghang mga tawo kada adlaw ug walay nasayod kun ang uban niini mga asymptomatic nga Covid-19 positive.

Maayo pa gani ang mga medical frontliners tungod kay duna silay background sa medisina ug may kaalam kun unsaon pagprotektar ilang kaugalingon kun sa normal lang nga sitwasyon. Usa pa, nasayod na silang daan nga ang ilang giatiman Covid-19 positive.

Daghan na sab kanila ang nangasakit ug nangamatay sa Covid-19 tungod sa ilang exposure sa mga pasyenteng ilang gitambalan. Nakatampo sab kining kakuwang na nila og pahuway maong huyang na ilang resistensiya.  Ang vaccination rollout sa gobiyerno adunay prayoridad nga lista sa kung kinsa maoy unahon ug mao kini ang gipatuman sa lokalidad. Kung ang medical sector giisip nga “vulnerable sector,” mao sab tingali sa lugar sa mga LGU officials.

Apan sa pagkakaron nga nihit pa gihapon ang supply sa bakuna ug nagsalig lang ang Pilipinas sa donasyon gikan sa COVAX sa World Health Organization, layo pa kaayo sa tinuod kun mahuman og bakuna ang tanan hangtud sa sunod tuig. Busa mas maayong sundon lang ang lista sa prayoridad aron dili magkagubot. Sunod lang una sa health protocols isip batakang proteksyon batok sa Covid-19.