Mga medical frontliners lang ang “Sakalam”

Kinsa man ang magtinabangay kon dili kita nga mga Filipino, ilabi na sa nahitabo karon sa National Capital Region o NCR+ nga nakasinati og grabeng pagsuway tungod sa pagkuyanap sa COVID-19 diin napuno na ang mga healthcare facilities.

Gawas sa pasilidad, nangaigo na usab sa virus ang mga medical health frontliners maong naglisod na gyud ang mga nahabilin ug halos dili na sila kaginhawa sa kakapoy.

Tungod niini, mipakita sa ilang kaisog ang mga medical health frontliners sa Sugbo kinsa miadto sa kaulohan isip augmentation sa COVID-19 response.

Gani sa pagpahigayon pa lang sa sendoff niadtong Miyerkoles gipasalamatan na silang daan sa bayanihon nilang pagpakabana sa mga igsuon natong Filipono didto sa NCR+.

Gilangkoban sa doktor, nurses, ug medtech ang deligasyon gikan sa Vicente Sotto Memorial Medical Center, aduna usay gikan sa DOH ug sa kalungsoran sa lalawigan sa Sugbo.

Pipila kanila ang akong nahinabuhi kinsa miangkon nahadlok sa ilang bag-ong mission apan mipatigbabaw ang gugma sa isig ka tawo busa nagpakaisog aron dili magpanuko sa pagtabang sa mga nagkinahanglan.

Isip pampalig-on sa ilang gibati gisaaran sila nga hatagan og insentibo nga gitawag og "in cash ug in kind."

Kong sumahon moabot sa P70 mil ang matigom sa mga health fronliners gawas pa sa ilang naandan nga sweldo.

Gikan kini sa Office of the Presidential Assistant for the Visayas, city ug provincial governments.

Dako naman kining kantidad nga makatabang kanila apan wala kiniy bili sanglit dili kabayran og salapi ang kabalaka ug labaw nang dili kabayran ang bayanihong lakang nga gihimo nila nga mahilakip sa kasaysayan sa pag igo sa pandemiya.

Niining pagtimaan sa Araw ng Kagitingan, ang mga medical health frontliners ang nagsalamin sa kaisog kinsa mibarug ug nakigkombate sa kaaway nga dili makita.

Busa angayan lang saludohan ang mga frontliners tungod sa ilang sakripisyo aron lang maserbisyohan ang katawhan.

Matud pa sa uban nga "Sakalam" ang mga doktor, nurses ug ang tanang naglangkob sa health care frontliners.