Ang misteryosong selda

Anaa gyud kaha kini o mugna lang sa huna huna sa mga hingtungdan, mura man sad og introduksyon sa drama.

Bitaw naghatag og tanghaga ang giingong sekreto nga selda sa Police Station 6 nga nahimutang sa Barangay Sawang Calero dakbayan sa Sugbo.

Base usab kini sa pamahayag sa mga dinakpan sa mga operatiba nga matud pa nila butanganan sa madakpan samtang nagpaabot nga modugo kay kon dili ideretso og balhog sa tinuod nga selda.

Mipahigayon og surprise visit ang Commission on Human Rights Chief Investigator Leo Villarino sa estasyonan sa kapolisan aron masuta ang sekretong selda. Ug sa gilauman na, wala na kini.

Apan sa wala pa siya mobisita nahinabi na niya ang tulo ka mga reklamante nga mihatag og discription sa secret cell sama sa giingong adunay gamay’ng aircon, naay baratohon nga electric fan, ug ubang timailhan.

Wala naman ang lawak apan nakita sa CHR nga adunay gamay lungag nga butanganan sa aircon apan wala na ang aircon, naa usab ang mga butang nga una nang giestorya sa mga reklamante.

Kong tinuod man ang obserbasyon sa CHR dako kunong obstruction ang nahitabo kay giusab na ang set up sa dapit.

Mao kini ang usa sa mga gitutokan sa CHR ang posibilidad nga adunay suway nga pagtabon sa kamatuoran.

Giklaro hinuon sa CHR nga wala silay gidapigan sanglit gusto lang masayran ang tinuod nga nahitabo.

Kong masuta nga sad-an ang mga gireklamong pulis angayan silang manubag apan kong makita nila nga dili tinood ang pasangil mao na usab kini ang higayon nga malimpyohan ang mga gireklamong pulis.

Wala ra man hinuon naglisod ang CHR sa ilang pakisusi sanglit cooperative ra man ang kadagkoan sa PNP.

Gipasalig naman hinuon sa PNP nga walay mahitabong pagtabon ug pagdapig sa mga nakahimo og sala nga nakaamong sa imahen sa organisasyon.

Gani naglihok na ang administrative case batok sa mga pulis nga gireklamo samtang ang kasong kriminal nasang-at sa piskalya.

Hangtod dili pa mapamatod-an nga sad-an ang mga pulis maisip silang inosente apan kong tinuod man ugaling angayan ni silang ibutang sa sekretong selda nga kalit lang mawagtang ug dili na gyud makita aron dili makasala pa pag usab.

Sa ingon dili na nila maduhigan og buling ang organisasyon sa nasudnong kapolisan nga seryoso sa ilang internal cleansing.