Mga manindahay ang prayoridad

Sa katapusan napahigayon gayud ang gipaabot nga groundbreaking alang sa bag-ong Carbon Market ning dakbayan sa Sugbo nga dugay rang gipangandoy sa kadaghanan ug sa lokal nga kagamhanan.

Bisan pa sa mga pagbabag sa pipila ka sektor, nahinayon gayud ang seremonyas nga maoy nagsignal pagsugod sa katukoran sa maong proyekto nga mag-isa unya sa Carbon ngadto niini sa usa ka world class nga merkado.

Ambot ngano nga daghan man ang mibabag batok sa katukoran sa maong proyekto. Ang tuyo lamang sa siyudad mao ang pagpanindot niini tungod kay wala gayud kini ma-improve sulod sa hataas nga panahon ug sa nanglabay nga mga administrasyon.

Daan nang mipasalig ang administrasyon ni Mayor Edgardo Labella nga walay trampas ang pagtukod sa maong proyekto ug nga unang makabenepisyo niini mao mismo ang mga vendor ug uban nga nanginabuhi diha sa maong merkado.

Apan bisan pa man niini, daghan ang nagduhaduha sa maong proyekto kay basin kuno nga maunsiyami ang ilang negosyo ug panginabuhian sa panahon nga moarangkada na ang private contractor nga maoy motrabaho niini.

Basin baya kon na-brainwashed kining mga ordinaryong vendor ug ubang nanginabuhi diha sa Carbon Market sa mga sektor nga adunay personal interes ug nga walay laing tumong kondili ang paglawgaw sa maong proyekto.

Ang problema mao nga gipamulitika na ang maong proyekto. Sa akong nakita, ang isyu gisakyan sa pipila kinsa mitabang kunohay sa kawsa niadtong mga naagragyado sa maong proyekto apan aduna diay laing agenda.

Hinaut nga malandagan kining mga vendor ug ubang mga nagsalig sa inadlaw nga operasyon sa maong merkado. Alang sa inyong kaayohan ang maong proyekto. Ang kalamboan sa Carbon Market kalamboan usab sa inyong mga negosyo ug ubang panginabuhian.

Didto sa ubang dagkong lugar sa nasud sama sa mga dakbayan sa Davao ug Baguio, adunay mga world class nga pangpublikong merkado ang kasamtangan nga gitukod. Ug hapsay ang pag-implementar sa moang mga proyekto tungod kay walay sektor ang mibabag niini.

Apan dinhi sa Sugbo, tulin pa sa alas kwatro kining mga adunay personal nga interes nga misakay sa isyu ug mibabag sa maong proyekto. Hinungdan sa dugang kalangay sa implementasyon niini ug kalugi sa mga proponent sa maong proyekto.

Sa ako nang giingon sa nakalabay nga mga kolum, walay madehado nga mga vendor ug ubang nanginabuhi sa Carbon sa maong proyekto. Kamo maoy prayoridad sa kagamhanan sa dakbayan nga unang makabenepisyo niini.