Pildi na ta ni COVID-19

Gihulagway sa Pangulo sa Philippines Hospital Association nga si Dr. Jaime Almora nga pildi na ta ni COVID-19 kini human napuno na ang mga tambalanan sa kaulohan ug silingang lalawigan sa mga pasyente nga natakboyan sa maong mananakod nga sakit.

Probelama karon sa mga tambalanan mao ang ilang kapabilidad sa pagtambal sa mga gipang-COVID ug dili ang ilang kapasidad. Giklaro ni Dr. Almora nga ang mga tambalanan adunay kapasidad apan ang dakong suliran mao ang ilang kapabilidad tungod kay nagkulang sila og mga health personnel sama sa mga nurses nga makaatiman sa mga pasyente nga gi-COVID.

Tungod niini, nanawagan si Almora sa nasudnong kagamhanan sa pagpadala kanila og dugang nurses aron matabangan sila sa kakuwangon sa personnel. Gisugyot sa pangulo sa Philippines Hospital Association ngadto sa nasudnong kagamhanan nga ang mga government nurses nga gipatrabaho og dili trabaho og nurse maoy patabangon kanila.

Apan gihimakak sa Department of Health ang gihulagway ni Almora. Giklaro sa DOH nga ang pagsulbong sa gidaghanon sa mga gipangtakboyan sa COVID-19 ang pagkapuno sa mga tambalanan sa mga pasyente nga gi-COVID wala kini magpasabot nga gilupig na ang gobiyerno sa kampanya batok sa maong sakit.

Giawhag hinuon ni Health Undersecretary Dr. Maria Rosario Vergeire ang mga tambalanan sa dili pag-isa sa iIang mga kamot batok sa COVID-19.

Sa pagkatinuod lang, kun gubat pa lang ni, pildi na gyod ta sa atong kaaway nga nagpadala og mga sundawo nga dili makita. Kini tungod kay nasudlan na sa atong kaaway nga si COVID-19 ang kampo sa atong mga sundawo ug kapolisan.

Sa wala pa ang semana santa, gisiradan ang Kampo Aguinaldo, ang headquarter sa Armadong Kusog sa Nasud human masudli ni COVID-19 ug mipatay og 48 ka mga sundawo. Samtang ang hepe sa kapolisan sa Pilipinas nga si General Debold Sinas natakboyan usab sa COVID-19. Miabot na sa 36 ka mga polis ang namatay tungod sa COVID.