Daghang media gipang-COVID-19

Paita karong panahona kay kon makasinati ka og hilanat ug pagpangapoy sa kalawasan, bation mo dayon ang dili tiaw nga kabalaka nga tingali og natakboyan ka na og coronavirus.

Dili ka usab bastabasta nga makapa-admit sa ospital tungod kay kinahanglan ka pa nga kuhaan og swab test, ug kon mao kana ang imong gibati, sigurado nga COVID-19 ang resulta.

Daghan na kanamong mga sakop sa media ang naigo sa COVID-19, ug silang tanan misaysay gyud sa kapait kon matakboyan ka nianang maong sakit.

Usa nako ka amigo nga media nga apil sa nakasinati og COVID-19, apan maayo na, miingon nga sigurado siya nga kadtong mga wa dili motuman sa mga health protocol, kon maigo na gani sila og COVID-19 di gyud tingali sila makapugong sa paghilak.

Kaniadtong Huwebes, kapoy kaayo ang akong lawas mao nga nagpamasahe ko, apan bisan pa og namasahean na ko, diha gihapon ang gibati ko nga kakapoy.

Pwerte gyud nga kapoya, pero dili man hinuon taas ang akong temperature, ug may sakit lang sa akong dughan. Gusto na gyud unta ko nga magpa-admit kay duna man ko’y insurance.

Apan nagpabilin ang akong kabalaka nga kon i-swab test ko, sigurado nga ingnon dayon nga COVID-19, ug apilon pa pag-swab test ang akong pamilya nga maayo’g lawas.

Mao nga giagwanta lang gyud nako, nagpapalit og daghang prutas nga adunay juice, ug hapit tanang mga mainom nga makapalagsik sa lawas.

Ang pait pa gyud kay dili ko makatulog kay mabatyag man nako ang ngulngol sa akong dughan. Gikuha nako ang akong gold plated nga gamay’ng imahen sa Sto. Niño ug maoy gigamit nako paghapyod sa nagsakit nga bahin sa akong dughan.

Gikaluy-an tawon, kay pagka Dominggo nawala ang sakit sa akong dughan apan nagpabilin ang kapoy. Misamot ang akong kabalaka kay kaniadtong weekend, miabot gyud og kapin sa 15,000 ang gidaghanon sa mga bag-ong Covid infections sa nasud.

Gisuwat ko kini aron pag-awhag gyud kaninyo nga magmatngon nga dili kita matakboyan og Covid kay pwerte nga paita kon anaa ka niining maong sakit.

* * *

Sa isyu nato sa Huwebes ug Sabado, hisgotan nato ang kontrobersyal nga isyu sa Cebu City Hall, ang kabahin sa pagtukod og modernized Carbon Public Market.

Ang atong buhaton, ipresentar nako kaninyo ang mga argumento sa duha ka habig – sa Megawide/Cebu City Hall ug ang baruganan sa mga vendors.

Maglaum ko nga pinaagi niini, inyong masabtan ang tinuod nga isyu kon maayo ba, o dili, ang pagtukod og bag-ong Carbon Public Market.