Unsaon pagtransfer sa ownership sa property
Dear atty. Divine,
Maayong adlaw kanimo, naa unta koy ipangutana nimo attorney. Akong amiga nakapalit og yuta barato ra ug naa na silay Deed of Sale, ang problema walay lot title, ang iyang pangutana attorney, makahimo ba siya og pa transfer sa iyang name bisan walay lot title? Unsaon ug pananglit puwede ma transfer pila pud ka years? Palihog ko og tubag sa problema sa akong amiga attorney. Daghang salamat.
Yenyen
* * *
Dear Yenyen,
Kun dunay Tax Declaration ang property nga iyang napalit pwede ra nga i-transfer sa iyang name ang Tax Declaration bisan kun way titulo ang property. Apan kinahanglan nga notarized ang iyang Deed of Sale ug kinahanglan nga naay description sa property nga iyang gipalit like Lot number, location sa property, unsay gidak-on ug unsay mga boundaries aron mamahimo kining kabasihan niya sa pag-process sa transfer.
Kun wa gani detalye ang iyang Deed of Sale pwede siyang magpahimo og usab ug papirmahan og usab sa nagbaligya ug iyang panotaryuhan aron dili sab siya mag-penalty sa BIR. Ang description sa property naa na makita sa Tax declaration ug adto kini niya kuhaon sa Assessor’s Office apan kun titulado ang property adto na makita ang description sa property sa titulo. Kun naa na siyay notarized Deed of sale ug copy sa tax declaration iyang ipa-compute sa BIR ang iyang Capital Gains Tax ug Documentary Stamp Tax ug iya kining bayran within a month gikan sa pagnotaryo samtang ang Documentary Stamp tax kinahanglan bayran sa petsa 4 sa mosunod nga buwan.
Ang BIR dunay list of requirements ug mao kini iyang i-comply. Once mabayran na niya ang Capital Gains og Documentary Stamp Tax, i-process sa BIR ang Certificate Authorizing Registration or CAR ug once ma-release na kini i-submit kini sa imong amiga sa Assessor’s Office sa lugar diin namimutang ang property alang sa pag-process sa transfer sa tax Declaration ngadto sa iyang name. Thanks and God Bless.
Atty. Divine
Alang sa inyong pangutana, palihug lang sa pag-email sa flores_divina@yahoo,com ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest
