Komusta atong relasyon uban Kaniya?

Ari usa kita sa laing dakong isyu, sama ka dako sa coronavirus disease o COVID-19 nga kamulong mihasi sa nasud ug sa tibuok kalibotan, ug nga wala pay nakitang alibyu ang mga banggiitan sa medisina batok niini.

Ania na man diay kita sa Semana Santa. Kadali ra gayud sa panahon. Mora’g bag-o pa man kadtong kwaresma sa niaging tuig. Gani mingaw kadto nga panahon kay walay mga relihoyosong panagtigom tungod sa pagsugod sa pandemiya.

Mora’g susama usab ang mahitabo sa Semana Santa karon sa niaging tuig. Sugod niadtong Dominggo, walay mga katiguman sa mga simbahan nga nag-obserbar sa kalihokan mahitungod sa paglutos ni Kristo.

Taliwala niining mangiob nga sitwasyon sa COVID-19, komusta na diay ang atong relasyon uban sa atong manunubos? Maayo ba taliwala niining seryoso natong kahimtang sa pandemiya nga wala pay solusyon nga nakaplagan?

Siguro hilabihan ka daghan ang mipaduol karon sa Ginoo ug nangayo og dakong tabang aron nga mahilayo gikan niining dakong kalisdanan nga sama niadtong mga salot nga nahisulat sa Balaang Kasulatan kaniadto.

Mao gayud kini ang kinaiya sa tawo. Sukad pa sa unang panahon. Basta anaa na gani sa kalisdanan, dayon lamang kini og talikod sa iyang hiwing binuhatan ug tulin pa sa alas kwatro nga makasangpit sa atong bugtong manunubos.

Apil na ako niining maong kinaiyaha. Hinuon walay dili masalaypon kanato sa ibabaw niining kalibotana. Kay tungod lagi kay tawo lamang kita, walay adlaw nga dili kita makasala sa atong buhat, sa pulong ug sa hunahuna.

Apan ang ato lamang nga konsolasyon mao ang pagduol sa kahitas-an aron nga mahaw-as kita gikan sa lunang sa pagpakasala.

Ug swerte kitang katawhan kay bisan sa atong pagkamakasasala, wala gayud moyamiid kanato ang labaw nga makagagahum.

Maayo na lamang kay dali usab nga makapasaylo ang Ginoo kanato. Matag duol nato kaniya, kanunay nga naghulat gayud ang iyang mga bugton aron paghangop kanato bisan pa sa atong pagkamakasasala.

Gani, Iyang gipadala nganhi sa kalibotan ang Iyang bugtong anak dili lamang aron sa pagpakighalobilo kanato kondili aron usab sa pagsabwag sa maayong balita mahitungod sa kinabuhi nga walay katapusan.

Ug sa pag-ula ni Kristo sa ibabaw sa krus, Iyang giako ang atong mga sala ug kasaypanan. Nagpasabot kini nga aduna kitay dakong tsansa nga maluwas ngadto sa kinabuhi nga dayon. Basta moduol lamang kita Kaniya.