Ekonomiya sa pandemiya

Nagnegatibo og 9.5 porsiyento ang Gross Domestic Product sa Pilipinas panahon sa pandemiya nga nagsugod niadtong miaging tuig 2020. Ang ekonomiya sa Pilipinas mao ang pinakaniwang kun itandi sa ekonomiya sa mga nasud nga sakop sa Association of Southeast Asian Nation (ASEAN), matud pa sa Ibon Foundation.

Gibasol sa Ibon Foundation ang administrasyong Duterte tungod sa sobra ra nga lockdown ug quarantine, hinay nga pagtubag sa pandemiya ug kakuwang sa tinuod nga economic stimulus sa pinakagrabe nga ekonomiya sukad pa niadtong tuig 1946.

Ang ekonomiya sa Pilipinas mitala og 9.5 porsiyento nga kontraksyon niadtong 2020 nga maoy nagpahinay sa lihok niini sa Southeast Asia ug nibutang sa pinakagrabe sa South Asia ug East Asia.

Kun itugbang batok sa kasamtangang presyo, ang ekonomiya sa Pilipinas nawagtangan og P1.54 trilyon sa miaging tuig o P4.2 bilyones sa matag adlaw.

Gamit ang datus sa Philippine Statistics Autbority Labor Force Survey, ang Ibon mibanabana nga anaa sa 5.8 milyones ka tawo ang walay trabaho sa tuig 2020, buot ipasabot daghang pamilya ang mapobre ug magotman.

Ang kombinasyon sa wala makatrabaho ug nakatrabaho pero ubos ang suweldo misamot ka daghan gikan sa 9.6 ka milyon niadtong Oktobre 2020 ngadto na sa 10.5 ka milyon niadtong Enero ning tuiga nga nagpasabot nga dugang pamilya ang pobre ug gigutom.

Ang Ibon miklaro nga ang 75 porsiyento nga mga kabus nga pamilyang Pilipino nga walay natigom nga salapi duol sa socio-economic nga stress tungod kay sila nakiglayog sa dili maayong resulta sa ekonomiya nga apektado sa pandemiya sukad pa sa miaging tuig.

Ang ilang numero anaa kini sa 18.6 milyones ka pamilya o katumbas sa 81.8 ka milyon ka tawo basi sa upat lamang ka sakop sa matag pamilya. Apil na niini ang pinakakabus nga 50 porsiyento sa 12.4 ka milyon ka pamilya nga sa bana-bana sa Ibon Foundation adunay kita nga P22,000 matag buwan sa pagsugod sa pandemiya ug ang laing 12 porsiyento anaa lamang kini kita nga P11,000 o paubos matag buwan.

Apan bisan pa man niini, ang adminsitrasyong Duterte nagtuo nga maayo ang pagkakupot nila sa pandemiya.