EDITORYAL - Panahon sa pamalandong

Kagahapong adlawa adlaw nga Domingo ang gitawag og Domingo sa Lukay o Bendisyon sa Lukay o mas naila nga Palm Sunday, nga para sa dili kaayo nasuhito sa tradisyon sa Romano Katoliko mao para nila mao ang sinugdanan sa Semana Santa.

Apan ang Semana Santa nagsugod gyud sa Miyerkules sa Badlis o Ash Wednesday nga diin ang mga debotong Katoliko magsugod sa pagpuasa pinaagi sa dili pagkaon og karne ilabi na sa adlaw nga Biyernes.

Tungod sa pandemiya gidili sa gobiyerno ang mga relihiyosong kalihokan nga dugokon sa mga magtutuo. Gilimitahan ang mga kalihokang makapatapok sa mga tawo tungod kay seryuso ang hulgang dala sa Covid-19.

Mao nga kagahapong adlawa sa Domingo sa Lukay wala ang mga naandang mga pasundayag nga gipaabot sa mga tawo nga masaksihan matag Semana Santa.

May basihan ang restriksyong gipatuman sa gobiyerno ilabi na nga mibalik na sab pagsaka ang mga kaso ug mas paspas pa gani ang pagdaghan niini kun itandi sa miaging tuig.

Dili husto nga balewalaon lang kining mga pahimangno tungod kay sa kauwahian ang tawong dili motuo nga dunay Covid-19 mao ray magmahay.

Kinahanglan nga mag-amping ang tanan ilabi na kadtong mga nagbakasyon kauban ang ilang pamilya o kahigalaan, tungod kay sa pagpasagad sa kaugalingon usa sa mga hinungdan nga daghan ang nangatakdan sa Covid-19.

Apan dili man gyud paglaroy-laroy o mga pasundayag diha sa mga simbahan ang kahulogan sa Semana Santa. Bisan wala niining mga kasikas diha sa Simbahan mahimong mamalandong lang sa kaugalingon ang tawo o magpenetensiya.

Mas mahinungdanong paningkamotan sa tawo nga mabalik ang koneksyon ngadto sa Kahitas-an bisag asa pa sila moadto karong semanaha.

Mas gikinahanglan kini karon nga ang tanan kapin na usa ka tuig nagpuyo nga may kakulba, kahadlok, kalisdanan ug kagul-anan dala aning pandemiya.