Balik sa ECQ

Miligid ngadto sa mas higpit nga enhanced community quarantine ang National Capital Region o Metro Manila ug silingan nga mga probinsiya niini gumikan sa padayong pagsaka sa mga kaso sa coronavirus disease o COVID-19 didto.

Sugod karong adlawa, hilabihan ka estrikto sa pagpatuman sa health protocols ang masinati sa maong mga lugar sulod sa usa ka semana. Kini agi og pagpakigbatok sa COVID-19 nga mibalik pagmangtas didto sa kaulohan.

Sumala sa atong nasinati sa niaging tuig, dili gayud lalim ang mailalum sa ECQ, ang labing estrikto nga klase sa quarantine batok sa coronavirus disease. Kini tungod kay hilabihan ka higpit ug ka limitado ang lihok sa katawhan.

Ug gawas sa matanggong nga katawhan, ang grabe usab nga maapektohan ilalum niining ECQ mao mismo ang ekonomiya.

Gani gumikan sa mga lockdown tibuok nasud, grabe nga mitibugsok ang ekonomiya sa Pilipinas sa niaging tuig.

Daan nang miangal ang mga ekonomista ug magpapatigayon nga daghan nang negosyo ang nanira gumikan sa higpit nga mga lockdown ug nga dili na angay nga mobalik pa ang nasud ngadto sa enhanced community quarantine.

Hinuon, niining pagbalik sa kaulohan ngadto sa ECQ, dili usab nato mabasol ang kagamhanan nga nanghingusog sa pagpatuman niini. Kini gumikan ra usab sa pagkabadlongon sa uban nga dili mosunod sa mga health protocol.

Maayo na lamang kay dinhi sa Sugbo, bisan pa man sa ka daghang malapason sa lagda, pabilin nga manageable ang mga kaso sa coronavirus disease. Angay lamang hinuon nga magtinabangay kita aron nga ma-maintain kini.