EDITORYAL - Di na panahon para magbasolay

Ang Pilipinas nalibotan og dagat mao nga matawag kini nga usa ka “maritime nation.”Duna kini sobra 7 mil ka mga isla nga gipuy-an sa mga Pilipino ug duna say daghang walay nagpuyo apan sakop gihapon sa teritoryo niini nga kinahanglang protektahan.

Bisan sa kagamayon sa Pilipinas ang baybayon niini moabot 36,289 kilometro.

Ikaupat sa tibuok kalibotan nga dunay kinataasang baybayon ug ikaduha sa tibuok kalibotan nga gitawag og ‘largest archipelagic State matud pa sa Food and Agriculture Organization sa United Nations.

Apan bisan sa kalapad sa bantayang kadagatan kuwang kaayo ang Armed Forces of the Philippines sa mga gamit aron epektibong maprotektahan ang teritoryo niini.

Ug tungod niini daghang mga langyaw ang namintaha sa kahuyang sa AFP sama sa  gipanghimo karon sa China.

Karong bag-o dunay tensiyon nga nahitabo sa Juan Felipe Reef sa Palawan tungod sa presensya sa 220 ka mga barko sa Chinese maritime militia nga nag-angkorahe didto. Sama sa naandan na, kutob ra sa  baba pinaagi sa diplomatikong protesta ang mahimo sa Manila ngadto sa Beijing nga unta giisip man kining ‘higala’ sa Pilipinas kun si Pres. Duterte pay paestoryahon.

Apan duna bay higalang mangawat sa butang sa higala? Ang China miinsister nga ilaha ang maong lugar sama kini sa ilang gihimo sa Scarborough Shoal niadtong 2013 ug karon sila nay nagkontrol.

Mabasol tinuod ang mga nanglabay nga mga administrasyon sa nahitabo sa teritoryo sa West Philippine Sea. Apan dili kini maoy solusyon.

Ang pagpangita og solusyon gisangon na sa katawhan sa kasamtangang administrasyon ug sa mga magbabalaod  nga naglingkod sa kongreso.

May panahon pa aron korihian ug solusyonan ang problemang gibilin sa nanglabay nga mga administrasyon.

Kinahanglan og dakong pundo ang DND para niini, apan ang Kongreso maoy nagdiktar kun pila ang pundong itagana para sa mga gustong paliton sa AFP.

Anhing dapita kinahanglang mopatigbabaw ang moralidad sa mga magbabalaod ug wagtangon kining kinaiya nga pagtihik-tihik sa pagpagawas og pundo alang sa DND. Uwaw kaayo paminawon nga politikahon ug sagulag kaugalingong interes ang para sa depensa sa nasud.

Wala ra bay laing mabulahan niini kondili ang mosunod nga mga henerasyon sa mga Pilipino.