EDITORYAL - Mag-anad daan

Dunay mga pagtuong dili na mawala kining coronavirus ug magsige nalang kinig balik-balik kada tuig sama sa ubog ug trangkaso.

Apan dili kini ordinaryong trangkaso sama sa uban tungod kay matud pa dali kaayo kining makatakod sa uban ug mas kuyaw kini niadtong dunay mga talandugon og panglawas.

Bisan kining nagkalainlaing bakuna nga nadiskubrehan ug gisugdan na sa paggamit sa nagkadaiyang mga nasud dili pa garantiya kun mosalir ba gyud batok sa virus. Karon palang gani duna nay daghang klaseng mga variants ang maong virus nga gituohan sa mga doktor nga mutation sa COVID-19.

Ang nakaayo lang niini, ang virus dili sama sa kabangis sa ubang virus ug kadaghanan sa mga natakboyan mga asymptomatic o way mga sintomas.

Wa pay nasayod kun hangtud kanus-a madiskubrehan ang tambal nga masaligan sa mga tawo kun sila matakboyan kay epektibong makaayo dayon sama sa mga kasamtangang antibiotics o antiviral drugs karon.

Tungod ani nga rason kanunay mabutang sa peligro ang mga tawo ilabi na ang mga nanarbaho ug maapektahan ang ilang panginabuhi.

Gumikan kay makatakod man gyud sila sa uban, kaning mga mamumuo kinahanglang dili patrabahoon aron magpaalim. Mas maayo tingaling iapil kini sa talaan sa mga hulga ug risgo nga makita sa mga trabahoan ubos sa mga balaod alang sa proteksyon sa mga mamumuo nato karon.

Kinahanglang maapil kini sa medical insurances ug dunay ayudang madawat ang mamumuno gikan sa gobiyerno o sa kumpanyang ilang gitrabahoan kun matakboyan sila niini.

Kay pagkakaron, may kahadlok sa dughan sa mga tawo kun sila magpa swab test kay kun mapositibo ma-kwaratina sila og dugay unya wala silay madawat nga sweldo. Tungod kay pinaagi niini matag masakit ang mamumuo dili na sila managana sa pagpa-swab test ug pag-absent. 

Makatabang kini sa gobiyerno nga mahunong ang paspas nga transmisyon sa virus diha sa populasyon.

Kining maong virus magdala kini og dakong problema kung dili kini atubangon karon, mas maayong mag-anad nalang ang tanan.