Mahal ang pagpabadlong

Kapin sa 126 bilyones ka pesos ang gigahin sa administrasyon ni Presidente Rodrigo Roa Duterte alang sa pagpalit og bakona nga mosagang batok sa Coronavirus disease 2019 o COVID-19. Gawas sa 10 bilyones ka pesos nga gigahin sa gobiyerno ubos sa Bayanihan to Recover as One Act, ang nahabilin pulos na inutang sa World Bank, Asian Development Bank ug Asian Infrastructure Bank.

Subo lang nga palandongon nga sa ka dako ning maong kantidad wala pa ta makakita sa dagway sa bakuna nga pinalit sa gobiyerno gamit ang kantidad sa salapi nga inotang. Sila si Senador Ping Lacson ug Riza Hontiveros nga nanguta asa na ang bakuna gipikhan ni Presidente Duterte atol sa iyang tigum kauban sa iyang mga sakop sa gabinete ug iyang giklaro ug gisugyot sa mga senador sa unya na pagpangita sa sapi kun anaa na ang bakuna. Ang tubag ni Lacson, wala siya mangita sa salapi kay naa ang salapi, ang iyang gipangita mao ang bakuna. Hain na.

 Ang mga eksperto miingon nga kun sundon lamang sa tawo ang ilang gipatuman nga health protocols sama sa pagsulob og facemask, face shield ug ang pagdistansiya o social distancing, 95 porsiyento sila nga mapanalipdan batok sa mananakod nga Coronavirus. Kun motuman lang gyod unta  ang mga tawo ug dili magpabadlong, dili gyod unta modaghan pag ayo ang mga matakdan o natakdan sa virus. Dili unta mangoutang ang administrasyon ni Duterte og bilyon-bilyon nga salapi para ipalit og bakuna nga makapanalipod sa iyang katawhan batok sa virus. Mahal ang pagpabadlong.

* * *

Ang COVID-19 murag sundawo nga dili makita nga gipadala sa kontra sa kanasuran sa kalibotan ug ang Pilipinas pildi na kay ang Kampo Aguinaldo nga mao ang headquarters sa kasundalohan sa nasud gi-lockdown tungod kay ang mga sundawo gipang-covid. Giangkon sa hepe sa armadong kusog sa nasud nga mas daghang sundawo ang namatay sa COVID-19 kay sa mga namatay nga polis. Ambot lang!