Dakpon bisan mitabang

Gipasidan-an sa kagamhanan ang publiko sa dili paggamit  sa “anti-parasitic drug” nga Ivermectin isip tambal batok COVID-19 tungod kay peligro pa kini. Nasayran nga adunay pundok sa mga doktor nga miawhag sa DOH sa pagkonsiderar sa maong druga. Tungod ba kaha sa kakulang sa bakuna mao’ng mitumaw kining sugyot sa mga doktor isip tabang sa gobiyerno.  Makapahinumdom sa estorya sa nadakpan kay naghimo’g minî nga kwarta.  Nagbagolbol siya sa pag-ingon, “Maglibog ako sa gobiyerno, moingon walay project kay walay kwarta.  Ato’ng tabangan himo og kwarta, dakopon man hinuon ta”.  Pagkatuytoy!

Kadaghan na makasuway

Adunay gipasaka nga balaodnon sa Kamara nga gipangamahanan ni Party-list Rep. Jose Singson, Jr. nga mag-uswag sa edad niadtong tugotan sa pagpanabako gikan sa 18 ngadto na sa 21 anyos.  Tumong niini ang pagpausbaw sa kahimtang sa panglawas sa mga kabatan-onan.   Daghan na nga propaganda ang gipasiugdahan ang kagamhanan, lakip na gani ang pagpanghadlok, aron mamenosan ang pagpanabako, apan wala kini paminawa. Alang sa hingtungdan, sayon ra gyud kaayo ang paghunong sa pagpanabako, kay gani makadaghan na man kini nila sulayi.  Baya no!

Matuod o minî?

Namulong ang General Secretary sa Communist Party of China nga si Xi Jinping, nga andam ang China makigtambayayong sa North Korea aron ma-preserbar ang kalinaw ug kahapsay diha sa Korean Peninsula. Dugang pa ni Xi, ang panaghigalaay sa China ug Korea usa ka mahalon’g bahandi nga gisaw-an sa duha ka nasud ug sa ilang katawhan.  Huwaton na lang nato kon unsay lintunganay niining ilang panaghigalaay pagpanglabay sa panahon. Kay ginaingon man nga “Ang tinuod ug malisod nga sitwasyon, maoy magasuta kon matuod o minî ba ang usa ka higala”.  Owrayt!

Walay sukod sa bawos

Segun sa balita, gipusposan sa kanhi estudyante ang iyang maestro didto sa Sto. Dominggo, Nueva Ecija hangtod nga kini namatay, ug dayon gidauban kini.  Sumala sa imbestigasyon, hubog ang maestro ug buot niyang pusasan ang estudyante, nga maoy gikalagotan sa naulahi.  Nangomedya lang tingale unta ang maesto apan natinuod lang. Ehemplo ba kini sa panultihon, “Walay sukod sa balos”?  O basin ba kaha nadasig ang maestro nga mangomedya kay usahay baya, adunay mga komedyante nga atong botohan ug pilion panahon sa eleksyon?  Hala no!

Langit ra’y nasayod

Mahimong pasirad-an ang mga Katoliko’ng simbahan nga mosupak sa kamandoan sa IATF nga nagdili sa mga relihiyosong panagtigum panahon sa NCR Plus Bubble sugod karong Marso 22 hangtod April 4.  Tubag kini ni Sec. Roque sa Pastoral Instruction ni Manila Auxiliary Bishop Broderick Pabillo nga nag-awhag sa pagsimba sugod Marso 24.  Lain’g panagbangi kini tali sa simbahan ug sa administrasyon.  Gahum sa kagamhanan batok gahum sa simbahan ang nagtigi ni’ng higayona.  Kon kinsa’y dapigan sa Kahitas-an, LANGIT RA ANG NASAYOD.  Salig lang!