Panghasi sa China

Ang Pilipinas usa ka gamay ra kaayo nga nasud, ug tungod niini, wa kita respitohi sa China nga kanunay lang mihimo og pagpanghasi kanato.

Dili pa lang dugay, kapin sa 200 ka Chinese commercial fishing vessels ang misulod sa kadagatan nga sakop na sa West Philippine Sea.

Nganong nahitabo man ni? Sa akong pagsabot niini nga isyu, mora’g ang rason nga mihasi ang mga Insik kay wa man magpakabana ang atong mga lider.

Gipasagdan ra nila ang China nga nangilog sa atong teritoryo.

Bisan sa panahon pa sa mga nangaging presidente sa nasud, mao ra gihapon ang sitwasyon.

Ang mga gihulagway nga illegal structures nga gitukod sa China sa West Philippine Sea, nahimo atol pa sa nangaging mga presidente kay gipasagdan ra man.

Karon, maglisod na ang Pilipinas sa pagpapahawa sa mga Insik kay anaa na gani silang military base didto sa West Philippine Sea.

Sa mao nga military base nila, makatugpa ang ilang mga eroplano nga igugubat, ug makadunggo ang ilang mga warships.

May mga military man ang Pilipinas nga gidestino sa West Philipine Sea, apan ang atong barko dili na modagan kay dunot na ug igo na lang giangkorahe.

Dunay miingon nga isog si Presidente Duterte, apan ang nakadaut kay nakighigala man siya sa China ug mao nga iya rang gipasagdan ang mga Insik.

Gani, si Presidente Duterte gikutlo sa balita nga mibutyag kini nga iyang gitugotan ang mga mananagat nga Insik nga makapangisda sa kadagatan nga sakop na sa Pilipinas.

Tan-awa, may hukom na man unta ang United Nations nga gipakanaug kapin sa tulo ka tuig na ang nakalabay, nga way katungod ang China pagtukod og mga structures sa WPS.

Apan kay gibaliwala ra man sa China ang hukom sa United Nations, wa na lang usab si Presidente Duterte maninguha ug mangita’g paagi. Ngano man?

Nahadlok ba si Presidente Duterte sa China. Aw, kon ang armas nga panggubat ug ang gidaghanon sa mga sundalo ang hisgotan, tinuod nga layo ra ang Pilipinas sa China.

Apan nagtuo ba kamo nga kon moinsister ang Pilipinas nga ipatuman ang hukom sa United Nations, makiggubat ang China kanato?

Wa kaha’y laing mga nasud, sama sa United States nga molaban sa Pilipinas kon himoon kana sa China? Ayaw ninyo kalimti nga dinhi sa Pilipinas daghan na kaayong mga Insik nga nanimuyo.

Makaako kaha ang China nga gubaton nila ang Pilipinas unya maamong ang kaliboan nila ka mga kadugo?