Walang lockdown sa Metro Manila
Palagay ko, kung may sapat na pondo ang pamahalaan para masustinahan ang pagbibigay ng ayuda sa taumbayan, hindi ito mag-aatubiling magpatupad muli ng lockdown sa buong bansa. Kaso, wala nang “pisi” ang gobyerno at kung patuloy na pinipigil ang galaw ng tao at negosyo, sa kangkungan na tayo pupulutin.
Pinabulaanan ng Malacañang ang kumalat na balita na muling maghihigpit sa buong National Capital Region at magpapatupad ng lockdown dahil sa pagsirit sa kaso ng COVID-19. Tinataya na kung hindi magbabago ang bilis ng pagtaas, aabot na sa 8.5 milyon ang kaso ng karamdaman pagdating ng Hunyo ng taong ito.
Naunang ibinalita na nagpasya raw ang task force na nangangasiwa sa pag-control ng COVID na magpatupad ng tinatawag na “circuit breaker” lockdown sa loob ng dalawang linggo para mapabagal man lang ang bumibilis na pagkalat ng sakit. Ito’y mariing pinabulaanan ni Presidential spokesperson Harry Roque.
Nilinaw ni Roque na ang napagpasyahan ng Inter-Agency Task Force ay ang implementasyon ng mas mahigpit na health measures na dapat sundin ng tao kung kailangan mang lumabas ng bahay. Kasama na riyan ang pagpapatupad ng curfew mula alas-diyes ng gabi hanggang alas singko ng umaga at ang mga regulasyong dati nang ipinatutupad: face mask, face shield at social distancing.
Sa nakikita natin, hindi sapat ang ipinatutupad na health protocols. Mahalaga pa rin na maisulong nang husto ang pagbabakuna na hanggang ngayon ay hindi pa maisagawa nang puspusan.
Totoo na kahit sa dalawang linggong lockdown, mahihirapan na ang pamahalaan kung papaano pakakainin ang milyun-milyong mamamayan na hindi makakapaghanapbuhay. Kaso, hanggang kailan tayo maghihintay sa pagdating ng epektibong vaccines para mabakunahan na kahit man lang kalahati ng mahigit 100 milyong populasyon ng bansa?
- Latest