EDITORYAL - Paspasi ang pagpamakuna
Magtulo na ka semana gikan nangabot ang mga bakuna batok coronavirus apan hangtud karon wala pa gihapon mahuman bisan katunga ang pagbakuna sa mga medical frontliners, mga security forces ug mga piniling opisyales sa gobiyerno.
Kaning mga bakuna adunay expiry dates ug matud pa kaning mga nangabot nga bakuna mo-expire karong Mayo. Apan dunay pipila ka brand sama sa AstraZeneca ang dunay taastaas nga shelf life kung dili pa maablihan.
Apan dili ang tanan ingon niini kadugay mopaso ang ka epektibo. Maong mahinungdanon kaayong ini og abot sa mga bakuna mahatag kini dayon.
Makapahibulong ug nakapangutana ang uban kun sa ingon niini ang gipaspason sa pagpamakuna, hangtud kanus-a kaha mabakunahan ang 70 milyones nga maoy target bakunahan sa gobiyerno?
Ang gobiyerno mipahibalo nga hangtud sa tuig 2022 o 2023 pa kutob ang pagpamakuna. Anang panahona daghan ng mga tawo ang protektado gikan sa virus.
Apan maayo sab tingaling paspasan pa sa gobiyerno ang pagpamakuna aron maapil ang mga ordinaryong mga Filipino ug dili lang mga taga gobiyerno sa mas sayosayong panahon.
Kinahanglang mobilisahon sa gobiyerno ang medical personnel niini hasta ang tanang medical personnel sa pribadong sektor aron mas daghan ang mabakunahan kada adlaw.
Tungod kay kun ingon niini lang gihapon kahinay, dunay mga vulnerable sectors sama sa mga senior citizens, mga tawong masakiton, mga mabdos,ug uban pa ang dili na maabtan pa sa maong mga tuig.
- Latest