Padayon pag-eksperimento

Ang mga dagkong nasud nga sakop sa European Union miduyog usab sa ubang nasud nga mipahunong sa ilang pagpamakuna ginamit ang AstraZeneca gumikan sa giingon’g side effects niini.  Apan miinsister gihapon ang WHO sa pagpa-gamit sa maong bakuna kay kuno wala pa’y tino nga kalambigitan ang giingong epekto ngadto sa bakuna.  Daw nag-eksperimento ra ang WHO sa katawhan ni’ng ilang pag-insister. Tingale disipulo ang kadagkoan sa WHO ni Ralph Waldo Emerson kinsa miingon nga “Ang tanang kinabuhi, usa ka eksperimento.  Magkadaghan ang buhatong eksperimento, mas labing maayo.”  Aw, mao ba diay!

Papadadap ra ang DOH

Sa may kalambigitan’g balita, ang Department of Health (DOH)-Central Visayas mipasalig usab nga luwas ug epektibo ang bakuna nga AstraZeneca.  Sama sa WHO, miawhag usab ang DOH sa padayon nga paggamit sa maong bakuna samtang gihuwat pa ang resulta sa imbestigasyon sa hinungdan sa giingong side effects niini.  Kon usa pa ka “choral group” ang WHO ug ang DOH, dayag nga walay yabag nga tuno nga atong mabati ni’ng awit-pagdayeg alang sa AstraZeneca.  Maingon ta nga lead singer ang WHO ug papadadap (background) ang papel sa DOH.  Baya no!

Special (batchoy) ang dating

Miangkon si Secretary Roque nga nagmahay siya sa iyang pagdumili pagpabakuna sa unang pagpahigayon niini hilabi na karon nga nagpositibo siya sa COVID-19.  Dunay baligho sa maong pamahayag sa Kalihim. Una, walay kaseguroan nga dili na mataptan sa coronavirus ang tawo nga ka-usa pa mabakunahan, kay duha ka dosage ang gikinahanglan. Ikaduha, dili usab apil sa priority si Sec. Roque kay dili man siya health worker. Labaw sa tanan, daghan pa’ng katawhan, nga giingon nga ila kunohay’ng gialagaran, ang wala pa mabakunahi. Special Batchoy ang dating. Fezteleern!

“Bawos-bawos pilar”

Giingon nga nagkadaghan karon ang mga dagkong opisyal sa kagamhanan ang mipaubos sa ilang kaugalingon sa kwarentinas human mag-positibo sa COVID-19.  Usa ka tuig na ang atong pakigbatok sa pandemya.   Kanhi, mga yano’ng lumolupyo ang naapektohan, ni’ng higayona, ang atong mga kadagkoan na usab ang natakdan.  Alegre ang pagsaulog nato sa kasumaran sa pandemya kay ang atong mga dagkong opisyales na ang nagpasiugda.  Makahinumdom kita sa linya sa libro sa Grade 1 kanhi nga nag-ingon, “Bawos-bawos Pilar.”  Hala no!

Ihikling ang garbo

Bisan gitugotan na sa Cebu City ang mga tradisyonal nga PUJ pagbiyahe, nasutâ nga kadaghanan sa mga operator walay kasibot tungod sa kanihit sa pasahero, gawas nga naglaraw na usab sila nga mopadagan na lang og mga modernong jeepney nga nagustuhan usab sa mga pasahero.  Tinuod nga mahimayaon ug tinubdan sa garbo ang mga jeepney, apan karaan na kini ug angayan na’ng bag-ohon.  Matud pa bitaw ni Benjamin Franklin, “Kon walay padayon nga pag-uswag, ang mga pulong paglambo ug kalampusan mahimong walay kahulogan.”  Tumpak Ganern!