Manatili sa tahanan para ‘di magka-virus
NAGAGANAP na ang kinatatakutan ng sambayanan na paglobo ng mga tinatamaan ng COVID-19. Hindi lamang yan mga suki, dahil may mga bagong variant pang kumakalat sa ngayon. Kaya marami nang mga lungsod sa Metro Manila ang inilagay sa hard community lockdown dahil halos napupuno na ang mga hospital.
Subalit ang nakakatawa, kampanteng-kampante lamang si Department of Health (DOH) secretary Francisco Duque III. Lahat daw ng kaparaanan naman ay ginagawa nila upang mapigilan ang paglobo ng COVID, hehehe! Kung sabagay maiiwasan naman ang pagkalat ng virus kung ang sambayanan mismo ang magdidisiplina ng kanilang sarili.
Ito’y sa pamamagitan ng pagpanatili sa mga tahanan kung hindi naman importante ang lakad at kailangan ding rendahan ang mga kabataan dahil isa rin itong tinitingnan ng mga dalubhasa sa medisina.
Kaya mga suki, ang aking paalala sa inyo, manatili sa ating mga tahanan para ‘di mahawa ng virus. Kung lalabas naman para maghanap ng makakain, laging magsuot ng face mask at face shield. Mahalaga ang mga ito para hindi makalanghap ng virus sa kausap o sa mga nakakahalubilo.
Bagama’t umarangkada na kahapon ang uniform curfew mula 10:00 p.m. to 5:00 a.m. dapat lamang na sundin ito nang makaiwas sa multa o makasuhan dahil sa paglabag sa health protocol. Kung kailan kasi nagdatingan na ang halos isang milyong doses ng bakuna (Sinovac at AstraZeneca) saka naman lumobo ang kaso ng COVID-19.
Hindi na biro ang 5,000 bagong kaso ng COVID-19 at kung magiging matigas ang ating mga ulo tiyak na hahantong ito sa 20,000 kaso kada araw at siguradong mag-uumapaw na ang mga ospital at isolation facilities. Kakapusin na tayo ng mga doctor at nurses na mag-aasikaso sa mga pasyente.
Kaya para makaiwas sa COVID, sumunod sa health protocol ng Inter-Agency Task Force. Ito na lamang ang sulusyon sa kinakatakutang pandemya. Tandaan na ang kaligtasan ng ating buong pamilya ay nakasalalay mismo sa ating sarili habang hinihintay ang bakuna na binili sa pamamagitan ng utang sa World Bank at Asian Development Bank. Hindi naman kuno mahahawakan ni vaccine czar Carlito Galvez ang datung dahil derekta ito sa mga pharmaceutical na binilhan ng bakuna.
Ang masaklap nito mukhang urong-sulong pa ang pagdating ng bakuna sa kadahilanan na maraming proseso ang hinihingi ng mayayamang pharmaceutical sa ating pamahalaan. Mukhang tira-tira lang ang maibabahagi sa atin dahil kabilang tayo sa mahirap na bansa. Get n’yo mga suki!
Kaya tiis-tiis lang muna. Kapag dumating na ang mga bakuna, lahat nang nakalista sa barangay ay mababakunahan. Walang pulitika rito, dahil siguradong mananagot sila kay Pres. Rodrigo Duterte. Iyan ang aabangan natin mga suki.
- Latest