Magtiayong doktor nga mga senior citizen nagpabakuna

Usa sa mga gihimong katarungan sa uban nga mga opisyal sa nasud nganong dili magpabakuna og Sinovac nga maoy unang niabot mao ang ilang pangidaron nga  60-anyos na pataas sanglit alang ra kuno sa 18-anyos hangtod sa 59-anyos ang mamahimong bakunahan.

Gani mao kini ang excuse ni DOH Secretary Francisco Doque III nganong wala siya magpabakuna ug mao usab ang katarungan ni Dr. Jaime Bernadas ang pangulo sa DOH 7.

Maayo naman lang unta makahupay sa kabalaka ug pagduhaduha sa mga tawo sa pagpabakuna kong makita ang mga opisyal sa Departamento sa Panglawas o sa gobiyerno nga maoy unang mabakunahan.

Hinuon tawo lang pud sila bisan kong naa silay gihuptan sa kagamhanan maong gitan-aw lang nila ang mamahimong mahitabo kanila ugaling ipamugos nga magpatusok aron lang mamahimong ehemplo.

Apan atol sa vaccine rollout kagahapong adlawa sa Perpetual Succor Hospital, adunay magtiayong doktor nga pulos senior citizen nga nagpabakuna nga silang Dr. Fe Marie Perez, 62-anyos ug ang bana nga si Dr. Monico Perez 62-anyos pulos nag alagad sa naasoyng tambalanan ug expose kaayo sa mga pasyente nga adunay COVID-19.

Sumala nila nga sa sinugdanan adunay pagduhaduha apan nahunahuna nila nga mas delikado ang virus kay sa bakuna busa wala nila palabya ang kahigayonan nga mapanalipdan ang ilang kaugalingon batok sa COVID-19 maong nagpabakuna sila bisan pa man sa ilang pangidaron nga wala nasulod sa age requirement sa Sinovac.

Tungod kay anaa man sila sa kalibotan sa medisina maong nihimo sila og kaugalingon nga research ug nasuta nga dili makadaut sa susama nila og pangidaron ang naasoy’ng bakuna.

Human sa pagpabakuna nila wala man silay nabatyagan nga advserse effect sa lawas, hinoon nakahatag kini kanila og kagaan sa pamati ug medyo nakuha kuhaan ang kahadlok sa COVID-19 kay natupokan naman sila sa unang dose sa vaccine.

Kong ingon pa lang niini ang kaisog nga gipakita sa ubang mga frontliners seguradong madasig ang mga kauban niini nga magpabakuna.

Matud nila nga ang pinakamaayo nga bakuna niining panahona mao ang bakuna nga anaa karon niabot.

Dili kinahanglan nga choosy ang mga tawo sanglit segurado nga safety ang bakuna kay niagi man kini sa y sa kagamhanan nga gisangonan sa pagseguro sa kaluwas sa bakuna.