Bakuna

Sugdan na karong adlawa ang pagpamakuna sa mga healthcare workers diha sa Vicente Sotto Memorial Medical Center batok sa COVID-19.

Si Dr. Gerardo Aquino, director sa VSMMC, mitug-an nga 600 lang sa 2,900 niya ka mga sakop ang modawat sa sinovac nga hinatag gikan sa China.

Ang uban nga mga healthcare workers niatras dihang nasayod nga sinovac ang bakuna nga ilang gamiton.

Si Dr. Mary Jane Loreche, tigpamaba sa DOH-7, miingon nga ang sobra sa kapin sa 7,000 ka mga nangabot nga bakuna alang sa Sugbo ilang ihatag sa ubang mga tambalanan nga gidumala gihapon sa DOH.

Aron pagdasig sa ubang mga healthcare workers nga magpabakuna, sila si Aquino ug retired general Melquiades Feliciano, IATF chief implementer for the Visayas, maoy unang magpatusok og bakuna karong adlawa.

Dili lang dinhi sa Sugbo ingon niini ang sitwasyon. Didto sa kaulohan nga maoy unang nakahimo sa pagpamakuna sa mga healthcare workers ingon sab niini ang ilang kasinatian.

Minus ang mga medical frontliners nga midawat sa Sinovac. Ug dili nimo sila mabasol tungod kay samtang nagsige og dasig ang gobyerno nga mosalig sa bakuna gikan sa China sila si Presidente Rodrigo Duterte ug Health Secretary Francisco Duque nag-ukon-ukon nga magpabakuna hangtud nga mibalibad gyud sa hingpit.

Ang ilang pangidaron maoy gihimo nilang rason tungod kay dili kuno makaayo alang sa mga senior citizens sama nila ang Sinovac.

Mao ni nakasamot sa kakuwang sa pagsalig sa publiko sa bakuna gikan sa China.

Apan atong klarohon nga aprobado na sa Food and Drugs Administration ang paggamit sa       sinovac.

Gani mismong ang pangulo sa FDA maoy usa sa unang mga nagpabakuna didto sa kaulohan.

Tingali dili ingon ana ka taas ang efficacy sa Sinovac apan maayo nalang kini kay sa wala gyud kay panagang sa coronavirus.

Sayop sab ang atong pagtuo nga kun mabakunahan dili na mataptan og COVID.

Ang bakuna usa lang ka paagi aron dunay panagang ang atong lawas pagbatok sa kagaw sa higayon nga kita matakbuyan niini.

Dili ni garantiya nga dili na gyud kita mataptan sa maong sakit. Apan mas maayo nga dunay bakuna kay sa wala gyud kay panagang.

Ug epektibo gihapon nga pagbatok sa sakit ang kanunay nga pagpanghunaw, pagsul-ob ug mask kun anaa sa daghang tawo ug ang paglikay sa tapok-tap