Illegal swertres

Naglantugi ang hepe sa PROBE Team sa Cebu City Hall ug ang usa ka magsisibya sa radyo kabahin sa padayong pagkatap sa mga illegal swertres stalls nga anaa sa aseras dinhi sa siyudad.

Matud sa radio broadcaster nga dili patas ang mga sakop sa PROBE Team nga gipangulohan ni Raquel Arce kay samtang kusog kuno manakop sa mga maninda sa aseras, apan gipasagdan ra ang mga illegal swertres stalls.

Tagsatagsaon nato pagtuki ang isyu aron gyud masabtan pag-ayo.

Ang PROBE gitahasan paghawan sa aseras sa tanang makababag sa pag-agi sa mga tawo, apil na ang mga tindahan ug bisan unsa nga anaa sa aseras.

Gisuportahan nako ang PROBE sa paghimo’g kampanya aron mahawan ang aseras kay nahasubay kana sa kahulogan sa ilang grupo nga mao ang Prevention, Restoration, Order and Beautification Enhancement.

Husto ang radio broadcaster nga napakyas ang PROBE paghawan sa mga aseras nianang gagmay’ng kahon nga anaa sa aseras kay ang tawo diha sa sulod maoy modawat sa pusta niadtong sugarol og swertres.

Si Raquel Arce nga maoy hepe sa PROBE mipakita og hulagway nga duna sila’y mga kahon nga gipang-alsa, gisakmit kuno nila gikan sa aseras.

Maayo tingali nga ang PROBE mohatag og report kon pila na ka kahon sa illegal swertres ang ilang nasakmit, ug hain na kini karon.

Kapila ra’y pagpangsakmit nianang mga kahon nga anaa sa aseras gibutang, ug kon paspasan sa PROBE ang pagsakmit niini, tingali mangundang ang mga abusadong illegal swertres operators sa paggamit sa aseras nga butangan nila sa ilang mga stalls.

Ikaduha, bisan ako nahibulong kon ngano nga nagkiyukpos man ang kapolisan ug wala man mohimo’g kampanya batok niining maong illegal nga kalihukan?

Wa ba moabot sa ilang mga utok nga illegal kining maong mga gagmay’ng kahon nga gigamit kunohay ug gipatoo nga legitimate nga Small Town Lottery (STL) outlets, apan diay ang resulta sa Lotto ang gibasehan?

Unsay nakahimo nga illegal niini? Ang legitimate nga STL operations, hitsas og mga gadgets nga kon mopalit ka og numero, hatagan ka og ticket nga susama sa ihatag nimo kon mopalit ka og lotto.

Ang tumong niini aron nga ang kada numero nga mabaligya mahibaw-an gyud sa kadagkoan sa Philippine Charity Sweepstakes Office (PCSO), apan unsay gihimo?

Ang mga stalls kon mga kahon nga mora’g bartolina way mga gadgets nga makaisyu og ticket, ug isuwat ra og kamot ang numero, kay masyaw man ug ang halin moderitso ra sa mga nagpasiugda sa illegal nga kalihokan.

Ambot kon kanus-a pa kaha makamata ang mga tinugyanan sa balaod nga nagkiyugpos lang kabahin niini nga illegal gambling.