Pagpatay dili tukmang sulbad

Init na kaayo ang ulo sa mga tawo. Tandugonon na ang mga utok. Gamay lang bikil, hala, patay-hikog dayon!

Ingon sa wala na hatagi’g bili ang kinabuhi – ang kinabuhi nga dili ilaha.

Kondili, iyaha sa Ginoo, ang tag-iya sa tanan natong kinabuhi.

Daw nauso ang paghikog tungod sa relasyong nangaguba nga miresulta sa wala nay pagsinabtanay.

Dili pa lang dugay, aduna na poy magtiayong naalaot human yugyoga sa usa ka pagsulay ang salag sa ilang kaminyoon.

Matud pa sa asoy sa mga anak, nga gusto na kunong bulagan sa asawa iyang bana. Apan dili makadawat ang bana niini.

Resulta? Gipatay sa bana ang asawa. Unya paghuman naghikog sab, binilin ang gituohang suicidal note sulod sa ilang pawnshop nga giminuldi sa pagsulat: “Akong mga anak.

Mao ra ni sulbad sa tanan. Mokuyog kong Mama ninyo. Pasayloa ako.”

Ug nasulbad ba ang suliran sa bana pinaagi sa iyang gibuhat?

Tinuoray, sa iyang pagpatay sa iyang kapikas ug sa iya mismong lawas, walay na siyay tulubagon sa balaod dinhi sa yuta. Dili na tuod siya mabilanggo.

Apan pag-atubang unya sa iyang espiritu didto sa atong Magbubuhat ug Maghuhukom, dili siya makaikyas sa balaud sa Ginoo nga gitunol Niya ngadto ni Moises aron maoy ipasunod natong Iyang mga binuhat.

Diin, usa niini nag-ingon: “Higugmaa ang imong isig ka tawo sama sa paghigugma sa imong kaugalingon.”

Unya, kon mohangyo ka sa Ginoo nga pabalikon ka dinhi sa kalibotan aron pagtul-id sa imong dakong sayop, o pagpahibalo sa imong mga igsoon ug kaparyentihan nga likayan gyod ang pagpakasala sama sa imong gihimo kay tinuoray g’yong naay langit ug impiyerno, igo ka lang tubagon ni Abraham, kinsa atua na na sa langit kauban sa Ginoo:

“Tua si Moises ug mga propeta. Mamati nila ang imong mga igsoon.” (Lukas 16:29) “Kon dili sila mamati ni Moises ug sa mga propeta, dili sila makabig bisag may mabanhaw pa sa mga patay.” (Lukas 16:31)

Ang pagpatay ug pagpakamatay tungod sa kahangol, kasuko’g kaguol nakalapas sa mga sugo sa atong Ginoo.

Dili kini ang tukmang sulbad sa suliran nga mohasmag sa atong kinabuhi. Kay ang pagbuhat sa ingon, makapahimulag lang nato Kaniya sa dayon.