Nag-una ang hambog sa bakuna

Gihangop ni Senate Majority Leader Juan Miguel Zubiri ang pagpasar sa balaod alang sa pagpamalit ug pagdapat sa COVID-19 vaccine, uban ang pasiatab nga ang Pilipinas maoy labing una’ng nasud nga mipalabang sa sama’ng balaodnon dugang sa pag-ingon nga “mga maayong laki ang lehislatibo sa Pilipinas”.  Sa ka maayong laki nila, daghan tinuod ang balaod sa Pilipinas apan duha ra ang napaingnan nini: Dili mapatuman kay dili haum o ba kaha, wala mapatuman kay daghan’g labaw pa sa balaod. Ang hambog niabot na, ang bakuna wala pa. Fezteleern!

Trial and error gihapon

Gitun-an karon sa Department of Agriculture (DA) ang paglibkas sa executive order nga nag-limit sa presyo sa mga produkto’ng karne.  Ang maong executive order gisaway sa mga magbabalaod ug sa mga konsumidor kay matud pa nakapasamot lang hinuon sa kalisod ug kanihit sa suplay sa karne.  Kakulang sa suplay ang sagad nga hinungdan sa pagsaka sa presyo sa palaliton. Angayan unta nga kini maoy pangandaman sa atong kagamhanan ug dili kay ang manindahay maoy puntingon ug silotan.  Hatag-bawi ug Trial and Error ra gihapon ang atong pamaagi sa pagsulbad sa nagbalik-balik na unta nga suliran.  Saoonz!

Daghan fish, way order part 2

Taliwala sa nagsaka nga presyo sa karneng baboy ug manok, mipasalig ang Department of Agriculture (DA) nga adunay igo’ng suplay sa isda sa kamerkadohan nga molungtad pa hangtud sa tunga-tunga ni’ng tuiga.  Bisan kon tinuod kining pasalig sa DA, daw wala gihapon kini epekto sa mga pobre kansang kalisod gisamutan sa padayon nato nga pagsagubang sa epekto sa pandemya.  Haum gihapon ang pagya nga “Daghan ang “Fish” pero “Way Order”.  Saoonz!

Gigamit pa ang classroom

Matud pa sa grupo nga Philippine Business for Education (PBEd), ang pagdelatar sa pagbalik sa face-to-face nga pagpahigayon sa klase makadaut pagsamot sa sistema sa edukasyon sa nasud ingon man sa kahimtang sa ekonomiya.  Tataw dinhi ang panagbangi sa sektor sa panglawas ug sa edukasyon, diin gipaboran sa Presidente ang nahauna.  Apan matud pa sa akong pilosopo’ng higala, “Kon ablihan na ang simbahan, sinehan ug buwangan, ngano’ng dili man ang eskwelahan?”  Niini gitubag siya sa laing pilosopo pag-ingon, “Dili ablihan kay gihimo pa’ng isolation facility”.  Pagkatoytoy!

 Wa epek ang reklamo

Giingon nga ubos sa administrasyon ni Presidente Duterte, moabot na sa 60 ka diplomatic protest batok sa China ang nahimo sa Department of Foreign Affairs diin 48 ka diplomatic notes na ang gitubag ug gi-aksyonan sa China.  Sa kadako sa gintang sa ekonomikanhon’g  kahimtang sa China ug Pilipinas, inay tampaling, daw halok ra sa aping ang epekto sa protesta nga gihimo sa Pilipinas.  Mas sakit pa tingale paminawon ang paak sa lamok.  Sige na lang kay sa walay eeek! Utong pa more!