Dili mo mahadlok?

Duna ko’y sugyot ngadto sa mga tawo nga wa motoo nga tinuod ang Coronavirus Disease nga sila mosulod sa ward sa mga ospital nga tua ang mga natakdan og COVID-19 gibutang.

Tan-awon nato kon dili ba mokurog ang ilang kaunoran sa kahadlok. Kinahanglan nga gakus-gakuson nila ang mga natakboyan og COVID-19 kay dili man sila motuo nga tinuod ang virus.

Daghan na kaayo ko og mga kaila nga natakboyan og COVID-19, ug ang labing uwahi, mao ang amigo nako nga photo journalist dinhi sa siyudad. Nagpaila man siya, apan di lang nako siya ilhon.

Kon dili pa tinuod nga dunay COVID-19, ngano nga ang opisyal sa Department of Labor ug ang tulo niya ka sakop sa pamilya nag-ulhos ra man sa pagpangamatay?

Tinuod, dunay uban sa mga natakdan nga wa gyud mamatay sa COVID-19 kay tingali lagsik ug lig-on ang ilang immune system sa lawas ug wa magpalupig sa virus.

Nagtuo ko nga dugay pa gyud nga mahanaw, o kaha dili na gyud mahanaw kining COVID-19, ug kining pagsul-ob nato og face mask, himoon na gyud nato kanunay aron paglikay sa virus.

Sayonan ka nga ang mayor sa Talisay City nga si Samsam Gullas ug si Presidential Assistant for the Visayas Mike Dino apil sa natakdan sa virus? May kanhi kongresista nga namatay sab sa COVID-19.

Unya, walo na ka mayor dinhi sa Sugbo ang natakdan ug may namatay gyud gani? Kon dili motoo nga tinuod ang Corona Virus, hala sulod sa ward nga tua ang mga nataptan og COVID-19.

* * *

Kon nagtuo kamo nga dunay mga opisyal sa kagamhanan nga nakasapi gikan sa dakong kantidad nga gigamit para sa pag-alkontra sa COVID-19, lahi na nga isyu.

Tinuod, dili imposible nga may mga opisyal nga nakakuwarta pinaagi sa pagpaburot sa prisyo sa ilang gipamalit nga mga bugas, sardinas, noodles ug uban pang kagamitan.

Apan dili komedya ang virus kay bisan sa Cebu City Hall dunay mga opisyal ug kawani nga nangamatay tungod sa COVID-19.

Usa man gani kini sa rason nga si Cebu City Mayor Edgar Labella gitambagan sa iyang pamilya nga adto na lang sa balay mag-opisina ug dili na moanha sa City Hall.

Bisan gani ang mga news reporters wa na kaayo mag-adtoan sa City Hall kay dili lagi nimo makita ang imong mga kontra nga mao ang virus.

Karong panahona, dili gyud maayo nga mokumpiyansa kay ania pa ang virus nagpaabot lang og higayon nga motakboy kanato.