Epicenter na pod

Gihulagway sa OCTA research nga epicenter karon sa UK variant nga COVID-19 ang dakbayan sa Sugbo tungod sa pagsulbong ning maong kaso. Apan ang kadagkoan sa Departamento sa Panglawas wala motuo niini tungod kay  wala pa kuno mapuno ang mga hospital ug ang mga COVID facilities.

Unsa man diay ang basihanan sa pagdeklarar nga ang usa ka dapit mao na ang epicenter sa COVID-19? Ang pagkapuno sa mga tambalanan ug facilities?

Basi sa talaan sa Emergency Operation Center, miabot na sa 67 sa 80 ka mga barangay sa dakbayan sa Sugbo ang adunay presencia sa COVID-19. Sa dili madugay malukop na gyod ang tanang barangay sa dakbayan sa presencia sa COVID-19 kun kada adlaw aduna gihapon daghan nga nadakpan tungod sa paglapas sa quarantine protocols.

* * *

Magpagawas og dakong kantidad sa salapi ang nasudnong kagamhanan aron ipautang sa mga nagnegosyo og baboy ug manok nga naalkanse tungod sa ka mahal niini. Apan nagpanuko sa pagkubit ang mga negosyante og baboy ug manok sa tanyag sa gobiyerno nga pautang tungod kay basin unya og madugangan lang hinuon ang ilang utang ug mosamot lang ang ilang suliran.

Kinsa gyod kaha ang atong paninglan sa pagmahal sa presyo sa karneng baboy ug manok? Nagtulodtulod naman gud ang tinubdan, ang miangkat ug ang mga namaligya sa merkado. Wala man god sila miangkon nga sila ang hinungdan sa pagtaas sa prisyo sa karneng baboy ug manok. Pero ang pinaka klaro niini mao  nga aduna gayoy nakaginansiya og dako sa iyang pagka walay puangod.

* **

Gikasuko ni Mayor Jonard “Ahong” Chan ang unod sa rap song ni EZ Mill nga giulohan og Panalo tungod kay sa maong rap giusab niini ang kasaysayan sa Pilipinas. Sa maong kanta giingon ni EZ Mill nga giputlan sa iyang liog si Lapu-lapu.

Kaduha na gyod ni. Kaniadto nagreklamo pod si kanhi mayor ug karon Kongresista Paz Radaza tungod kay adunay nag-ingon nga ang diaper maoy hinungdan sa kasuko ni Lapu-Lapu ngadto kang Magellan. Luoya pod ni Lapu-Lapu.