Contact tracing pabiling kuwang
Usa sa nabantang nga problema sa kampanya sa Sugbo ug Central Visayas sa pagkontrolar sa paspas ug lapad nga tinakdanay sa Covid-19, labi na sa Dakbayan sa Sugbo nga maoy gigikanan sa 56% sa tanang bag-o nga kaso sa rehiyon, mao ang kakuwang sa contact tracing.
Sama sa ubang bahin sa Pilipinas, napakyas ang lokal nga mga opisyal sa Dakbayan sa Sugbo ug rehiyon sa pagtultol sa tanan nga nakaduol ug posible nga natakdan sa mga pasyente sa Covid-19. Ug busa mahimo nga makapanakod ang close contacts og mas daghan.
* * *
Gisagop sa Inter-Agency Task Force (IATF) batok sa Covid-19 ang rekomendasyon ni contact tracing czar Benjamin Magalong, sa wa pa siya mo-resign tungod sa pagtambong uban sa iyang asawa sa party nga nakalapas sa health protocols sa iyang kaugalingong nataran sa Dakbayan sa Baguio, ang mosunod nga mga lagda:
Kinahanglan nga matultolan ang labing menos 37 ka close contacts sa matag positibo nga kaso sa dagkong dakbayan ug kalungsoran; ug
Kinahanglan nga matultolan ang labing menos 30 ka close contacts sa matag positibo nga kaso sa ubang dakbayan ug kalungsoran.
* * *
Apan bisan pa sa kapin sa 255 mil ka contact tracers nga gikontrata sa Department of Interior and Local Government (DILG) ug local government units (LGUs) ug gahin nga P1.9 bilyones alang karong tuiga, pito ra ka close contacts ang natultolan sa matag positibo nga kaso.
Sa ato pa, 81% sa posible nga natakdan sa urban areas ug 77% sa suspitsadong mga kaso sa ubang dakbayan ug kalungsoran wa mailhi ni mabuwag ug mahimong padayon nga nanakod sa ilang kaparyentihan ug kasilinganan.
* * *
Sa niaging semana, Pebrero 7 hangtod 13, nag-average ang Central Visayas ug 333 ka bag-ong kaso ug 3,032 ka swab tests matag adlaw. Niburot ang average nga positivity rate sa rehiyon ngadto sa 11.04%, sobra pa sa doble sa target nga 5%.
Nabantang sab nga kuwang ang contact tracing. Kon tumanon ang lagda sa IATF, kapin sa 10,000 unta ka close contacts ang napaubos sa swab test. Sa ato pa, dunay kapin sa pito ka libo nga posibleng nataptan na sa kagaw nga wa matultoli ug padayon nga nanakod.
* * *
- Latest
