Patas ang katungod sa mga anak sa kabilin

Dear Atty. Divine,

Duna mi na  inherit nga yuta gikan sa among parents. Tulo mi ka magsuon apan sa wala pa namatay ang among mama, ang akong igsuon maoy nagatiman kaniya. Apan ako maoy nagsuporta kanila kay naa man koy ginagmay nga negosyo. Pagkamatay sa akong mama midesisyon ang akong igsuon nga i-divide namong tulo ang property. Apan siya ra may nagbuot tanan kun asa dapita among bahin. Mamahimo ba diay na nga siya ray magbuot? Ang ako sad usa ka igsuon gustong ibaligya ang iyang share bisan kun wa pa gyud hingpit nga ma-subdivide ang property, mamahimo ba diay nga ibaligya na ang iyang share nga wa pa man ma-finalized  ang among pag-partition? Daghang salamat.

Jenny

* * *

Dear Jenny,

Kamong mga compulsory heirs, equal mo og bahin sa yuta nga inyong na inherit sa inyong mga ginikanan. Buot ipasabot nga patas sab mo og katungod. Kun ang inyong igsuon maoy nagbuotbuot mamahimo man mo nga moreklamo ug inyo siyang sultian nga dapat makigsabot siya ninyo kun unsaon pag-partition ang inyong yuta. Kay kun di mo magkasinabot mangabot pa mo sa korte ug malangay na hinuon pagayo ang inyong pagbinahinay. Kun ang usa ka igsuon gusto sab mobaligya sa iyang share mamahimo man kini niyang buhaton basta dili lang mosobra sa iyang share ang iyang ibaligya ug kay wa pa man kini ma-subdivide kun unsay outcome sa partition mao sab kini ang dapat mapanagiya sa buyer. Thanks and God bless. — Atty. Divine

Alang sa inyong pangutana, palihug lang sa pag email  sa flores [email protected] ug akong tubagon ang inyong pangutana  pinaagi sa akong column matag Miyerkules, Sabado ug Domingo.