May ungo sa City Hall

Gibulgar ni Cebu City North District Councilor Prisca Niña Mabatid pinaagi sa iyang social media account nga adunay ungo ug  puppet sa City Hall. Ang ungo sa City Hall iyang gihulagway nga diktador ug gidiktaran niini ang mga konsehal sa dakbayan sa Sugbo. Ang gibuhat sa ungo nga diktador sa City Hall nakapauwaw kaniya nga usa ka pinili nga opisyal.

“Kabalo ba mo nga naay Ungo sa City Hall  nga maoy nagbuot-buot sa tanan gikan sa pagpadagan sa City Hall, sa mga supplier sa bugas, ug tigdiktar sa mga puppet nga konsehal unsay buhaton sa budget - kinsay tagaan ug kinsay dili?” Unod kini sa post ni Konsehal Mabatid sa iyang social media account.

“ Sorry, I’m not a puppet councilor. Mobarug ko kung unsay insakto. Ayaw paghuwat mabulgar mo kay di ra ba ko mahadlok mosulti sa tinuod bahala na og pahawaon ko ninyo. Enough! Hadlok mo og ungo? Ako dili,” dugang pa sa konsehal.

Makuyawan naman hinuon ko ani nga moadto sa City Hall kay naa man diay ungo. Mahadlok man god ko mabalbal sa ungo. Mamalbal baya ning ungo, I labi na kon dili nimo silingan.

Bisan wala isulti ni Konsehal Mabatid kun asa nga opisina nagtago ang ungo pero nagduda ko nga anaa kini magpabugnaw sa opisina sa mayor.

Gawas sa ungo, naa pod diay mga puppet nga mga konsehal nga magsunodsunod lang sa diktar sa ungo. Pero gipaneguro ni Mabatid nga dili siya puppet nga pagkakonsehal.

Kun si kinsa kining ungo nga giingon ni konsehal Mabatid kinahanglan nga iya kining hinganlan aron makabantay ta ug atong mailhan aron ato kining malikayan kun atong ikahinagbo inig adto nato sa City Hall.

Kinahanglan usab nga hinganlan ni Mabatid ang iyang giingon nga mga puppet nga konsehal nga mosugot lang nga diktaran sa ungo nga diktador.