“Ungo sa City Hall”

Daghan ang naukay sa Facebook post ni Konsehal Niña Mabatid niadtong weekend diin iyang gihulagway nga dunay “ungo” sa Cebu City Hall nga maoy nagbuot sa mga kalihukan sa dakbayan.

Apil kuno sa gikontrolar sa “ungo” mao ang mga kauban niyang konsehal nga way kaugalingong baruganan.

Sigun ni Mabatid ang “ungo” maoy magbuot kinsay konsehal nga hatagan og pundo.

Ang mas seryoso niyang pasangil mao ang giingong anomaliya sa paggamit sa pundo sa gobiyerno alang sa pagtubag sa pandemya nga gibuhat sa iyang gihulagway nga “ungo.”

Nagdumuli siya pag-ila kinsay iyang gipasabot apan sayod ta nga dili literal nga ungo sama sa atong nahibaw-an ug gikahadlokan niadtong gamay pa kitang bata ang iyang gipasabot.

Ang paghulagway sa atong katiguwangan kaniadto sa ungo mao nga mosuyop ni og dugo sa tawo.

Busa alang nako tukma ang paghulagway ni Mabatid sa opisyal sa dakbayan nga giingong nalambigit sa pagpangurakot sa pundo sa gobiyerno.

Wala tinuod siyay kalainan sa “ungo” nga mosuyop sa dugo sanglit ang kwarta sa kagamhanan maoy nagsilbing dugo nga naghatag og kinabuhi sa paghatud sa serbisyo ngadto sa katawhan.

Isip piniling opisyal sa dakbayan dunay tahas si Mabatid nga gisangon kaniya sa katawhan pagpanalipod sa ilang interest.

Ug kabahin sa maong tahas mao ang pagtug-an kinsa ang maong “ungo” nga nagpahimulos sa iyang gahom.

Responsibilidad ni Mabatid nga sigurohon nga mataral sa hukmanan ug manubag sa iyang salaud sa katawhan ang maong opisyal.

Dili makiangayon sa iyang mga kaubang konsehal ang iyang pangangkon nga gigawngan sila sa ilang trabaho.

Busa angayang pugson sa konseho pinaagi ni Bise Mayor Michael Rama si Mabatid nga pamatud-an ang iyang pasangil.

Ug kun tinuod siyang nagpakabana, angayang mobarog si Mabatid sa hawanan sa konseho og mohimo og privilege speech pagkondinar sa iyang giingon nga anomaliya ug ipaimbistigar ang mga responsabling opisyal.

Ang paghimo niini makalikay kaniya gikan sa posibling mga pasangil nga siya igo lang nagpatagad aron makakuha og atensiyon sa media alang sa personal nga ambisyon sa politika.