Magpabakuna, dili?
Karong buwana na maabot ang bakuna batok sa COVID-19 apan samtang nagkaduol na ang adlaw sa pagpamakuna, nagkakulba man hinuon.
Angkonon nako nga gibati usab ako og kahadlok sa posibleng epekto sa vaccine kay lagi first time kini nato.
Dili man malikayan ang kabalaka sama sa uban seguro nga mibati usab niini pero angayan ba nga magpadaug kita sa atong kahadlok?
Ang matag usa ra gyud kanato ang makatubag ug makahukom kong magpabakuna o dili.
Sa akong bahin ayha na ko makahukom inig abot na gyud sa bakuna.
Gikinahanglan nga andamon nako ang akong huna huna ug pagbati kay basin og makaapekto na hinuon kini sa akong sestema.
Mixed emotions ang kabalaka ug kahigwaos or excited kay sa kataposan duna nay pangontra sa balatian.
Hinuon dili man garantiya ang bakuna nga dili na takboyan sa COVID-19 busa padayon gihapon kita motuman sa protocol.
Sa Pebrero 15 gikatakdang moabot ang bakuna ug ang maapil sa unang mahatagan ang mga health frontliners sa Vicente Sotto Memorial Medical Center.
Adunay kapin sa 2,000 kanila ang maka-avail busa apil sila sa gipaubos sa simulation gahapong adlawa.
Inihap ug sineguro ang tanan kong mahimo perfect ang vaccine execution kay kong masipyat dako og kadaut nga mamugna, masayang ang vaccine kay dili na magamit o simbako makamugna og kadaut sa matusokan niini.
Sa kaulohan murag taodtaod naman nag practice pero diri sa atoa wala may LGU nga nagpahigayon og simulation aw basin madala pa.
Unta kaniadto pa nagbansay bansay na aron dili magkara kara sa pag abot na sa bakuna.
Sama sa mga tawo andamon nato daan ang kaugalingon kay inig naa na ang bakuna makahukom na kita kong magpabakuna ba o dili.
- Latest