Katin-awan sa Carbon Market development

Mora’g daghan sa mga vendor diha sa Carbon Public Market sa dakbayan sa Sugbo ang wala masakabot sa proyekto sa lokal nga pangagamhanan pagpalambo sa maong merkado ngadto sa usa ka world class nga inprastraktura.

Kini tungod kay alang kanila, mameligro kuno nga makulban sila sa kaldero kon ma-privatize gayud ang Carbon Market taliwala niining lakang pag-develop niini. Apan unsa kini ka tinuod? Atong susihon ang gisaad sa developer sa maong proyekto.

Matud pa sa Megawide, ang gitugyanan sa dakbayan nga motikad sa maong proyekto, walay usa ka vendor ang mawad-an sa iyang panginabuhian. Gani mas nindot ug hamogaway unya ang ilang puwesto sa maong merkado.

Aron masabtan sa tanan, ilabina sa mga vendor diha sa Carbon Market, ania ang mga tubag sa mga pangutana mahitungod sa maong proyekto. Migawas na kini sa social media apan akong ibalik dinhi alang sa dugang katin-awan.      

Pasakaan ba ang abangan sa mga vendor? Dili tungod kay magbasi gihapon ang renta sa Carbon Market Code ug ang Cebu City government gihapon ang responsible niini, ilabina ang Konseho sa dakbayan.

Aduna bay vendor nga matangtang tungod sa maong proyekto? Wala. Kadtong mga vendor nga anaa sa listahan sa Market Operation Division as of December 31, 2020 sigurado nga ma-renew gayud ang ilang kontrata.

Tinuod ba nga magbayad ang mga vendor og registration fee aron masiguro nila ang ilang stall? Dili tinuod kining maong kabalaka tungod kay walay reservation fee nga gihan-ay ang Megawide ug Cebu City government.

Taliwala sa development niini, mahimo na ba nga pribado ang Carbon Market? Ang tag-iya sa Carbon Market ang Cebu City government gihapon ug dili ang unsa mang pribado nga kompanya.

Samtang gipanday pa ang pasilidad, asa ibalhin ang naapektohan nga mga vendor? Kanus-a magsugod ang ilang pagbalhin sa puwesto?

Ang una nga ibalhin ang mga vendor sa Freedom Park ug Warwick Barracks. Samtang gitukod pa ang Carbon Market, adto sila ibalhin sa Unit II sugod karon Setyembre karong tuiga.

Unsa man ang role sa Megawide ug Cebu City government sa Carbon Market development? Ang Megawide mao ang developer ug partner niini ang local government unit (LGU).

Ang Megawide maoy mo-construct sa mga building, pagnindot sa mga karsada ug pag-maintain sa mga inprastraktura.

Ang LGU, sa laing bahin, maoy in charge sa palisiya ug pag-monitor sa tibuok Carbon Market. Sa laktod, magtinabangay sila alang sa katumanan sa maong proyekto.

Hinaut nga masabtan sa tanan, ilabina sa mga hingtungdan nga mga vendor, ang development sa maong merkado.  Maayo kini nga proyekto nga angay lamang suportahan sa tanan.