Kumusta na ang mayor

Dunay awhag ngadto ni Cebu City Mayor Edgardo Labella nga ibutyag niya ang tinuod nga kahimtang sa iyang panglawas.

Nakabantay ang mga tawo, ilabi na ang mga alyado sa kaatbang nga partido ni Labella, nga nakasinati og grabeng sakit ang mayor.

Gani si Vice Mayor Michael Rama nagpadungog-dungog na nga kon dili na gani kaya sa mayor, nasayod na siya unsay angay niyang buhaton.

Panagsa, magbayloay mi og chat/text message si Mayor Labella ug matud niya nga naayo na ang iyang ear infection, apan gitambagan siya nga dili usa moadto sa Cebu City Hall.

May pipila ka kawani man gud sa Office of the Mayor nga napositibo sa coronavirus disease mao nga ang pamilya sa mayor ug ang iyang mga suod nga higala, mitambag nga sa balay lang usa siya magtrabaho.

Aw hinuon, tungod sa moderno nga teknolohiya karon, mahimo man nga momando ang mayor sa iyang mga sakop pinaagi sa cellphone ug mga memorandum pinaagi sa electronics mail.

Dili gyud hinuon nato mabasol ang katawhan nga mobati na og kahingawa kon naunsa na si Mayor Labella, kay gani kagahapon, usa ka abogado ang nanawag nako ug nangutana bahin sa mayor.

Ang nindot ni Labella nga kanunay siya nga magpakita sa katawhan aron nga dili sila magbaton og mga pagduda, nga kuno luya na kaayo ang atong mayor.

Ato usab iampo ang dali nga kaayohan ni Mayor Labella.

* * *

Ang mga naninda sa Carbon, ilabi na ang kadagkoan sa Cebu Market Vendors Cooperative (CEMVEDCO) dili gyud supak nga bag-ohon ang Carbon Market, apan supak sila nga i-privatize ang pagdumala niini.

Matud ni Erwin Gok-ong, pangulo sa CEMVEDCO, nga bisan og ang pag-modernize sa Carbon Market gastohan sa Megawide apan dili gyud kay pagbut-an lang ang maong pribadong kompaniya nga modumala sa merkado.

Ang nabalak-an nila ni Gok-ong nga mosaka gyud pag-ayo ang abangan sa mga stalls kon ang Megawide na ang modumala kay mas daghan sila og sakop sa gimugna nga Oversight Committee nga maoy nagsilbi nga policy-making body sa pagdumala sa Carbon.

Ang wa mauyoni nilang Gok-ong kay ang 1,600 ka stall holders sa Freedom Park, Warwick Barracks, Unit 1, 2 ug 3 sa Carbon Market, adto ra ipahimutang sa tukoron nga building sa nahimutangan karon sa Freedom Park ug Warwick Barracks.

Ang Unit 1, 2, ug 3, tukoran og building sa Megawide apan himoon kini nga mora’g mall nga makapaninda gihapon si bisan kinsa, kon makaabot sa abang, ambot og ang kantidad ba base sa Market Code mao ba gihapon ang basehan.