EDITORYAL - SK officials hain naman mo?

Hilom ra kaayo ang mga opisyales sa kabataan sa kabarangayan o mga sakop sa Sangguniang Kabataan sugod pa sa nakalabay nga tuig hangtud karon.  Hinuon, basin tungod kini sa pandemiya sa Covid-19 ilabi na sa mga restriksyon nga gimando sa gobiyerno.

Usa ka tuig silang wala igdungog diha sa ilang mga dapit. Tungod ba kay gibawalan ang mga edad katorse anyos paubos? Unsa man diay gihimo sa mga opisyales nga 15 anyos pataas, nanago lang sa suok?

Sumala pa sa report, dinhi sa Cebu City, dunay napulo ka mga barangay nga diin ang mga SK officials wala maglihok.

Unsaon naman lang kining ubang mga SK officials nga wala maglihok ilabi na karong dunay pandemiya? Dawat lang sila og limpyo, suweldo unya way nahimo?

Dili ba higayon naman unta nilang mopakita hinuon og maayong labok pinaagi sa paghimo og mga programang makatabang sa sektor sa kabataan diha sa ilang mga barangay?

Daghan unta kaayo sila og mabuhat aning panahona ilabi na pagtabang sa mga kabataan nga nangatanggong sa balay gumikan sa mga gipatumang restriksyon ug niining distance learning.

Mahimo sab unta silang moabag sa ilang mga barangay sa pagpatuman sa mga tawo sa gimando nga mga health protocols diha sa ilang mga barangay ug uban pa. Saludo sa mga sakop sa SK nga bisan pa man sa sitwasyon karon mugna aning pandemiya nakabuhat pa gihapon sila og maayo para sa ilang barangay ug sa ilang hut-ong.

Mao kini ang mga kabataang kinahanglang pasanayon aron ang nasud makabaton og mga tinud-anay nga lider nga magdala sa Pilipinas ngadto sa kalamboan.

Kay ang SK training grounds man unta sa mga umaabot nga mga lider sa nasud? Dili unta kalimtan sa kasamtangang opisyales sa SK sa tanang suok sa nasud nga kaniadto pa daghan nang mga pagsaway nga gibato sa maong programa.

Sa mga SK officials diha nga wala pay gihimo hangtud karon, mas maayong molihok-lihok na gamay. Dili kay anha ra magpakita kun hapit na sab ang eleksyon.