Duterte gimahal sa katawhan

Dili malalis. Sa tanang presidenting miagi sa Pilipinas, gawas ni anhing Pres. Ferdinand E. Marcos, si Pres. Rodrigo R. Duterte ray nakahimog daghan kaayong proyekto nga napuslan sa katawhan. Si PNoy Aquino, kinsa maoy nasundan ni Duterte, wala ra sa kumingking!

Naghitak proyektong binuang nga natukod panahon sa administrasiyon ni PNoy. Kadtong taytayang hinimo sa kahoy nga kabahin sa Housing Project didto sa Zamboanga City, diin maoy giagian sa mga opisyales sa gobiyerno?  Pastilan, samtang sila naglakaw, nalus-ag!

Kadtong P295M kasilyas nga walay partisyon, diin magkit-anay sa ilang pribadong tinagoan ang mogamit.  Ug kadtong P7.8M proyektong flagpole ni PNoy nga gipabarog sa Luneta, pastilan, pagkawala gyoy klaro.

Pero pagpuli ni Pres. Duterte, nagpusotpusot ang daghang mapuslanong proyekto ug kalamboan nga namarog.

Ang nagakahugaw’ng Boracay, iyang gipalimpiyohan ug gipaguwapag samot. Ang nagkamuritsing Manila Bay, iyang gipanindot ug nahibalik ang kanhing kaanyag sa mga romantikong bidlisiw sa kahaponon.

Ang P7.9B Tide Embarkment o gitawag og Great Wall of Leyte in the Philippines Project nga gisugdan 2016, diin gibanabanang mahuman inig ka 2022. Ug ang Stage 3 Skyway NLEX to SLEX sa Manila nga nakasulbad sa EDSA traffic problem, pipila lang kini sa daghan na niyang nahimo.

Saludo ko sa political will ni Duterte. Sa iyang mga pamaagi, milutaw ang mga dilawang opisyal, kinsa nag-usik-usik lang sa kuwarta nga gisuweldo sa katawhan kanila. Kay imbes makigtambayayong sa mga bug-at bulohaton sa presidente, sige hinuo’g kontra. Mga walay pulos!

Ang makalagot, kay dili baya sila ang gibotaran sa kinabag-ang botante. Ug nganong maoy midaug? Unya kini ra ba sila, maoy numero unong misupak sa himuonong death penalty alang sa nahilambigit sa drug syndicates.

Wala sila mosuporta sa war on drugs ni Duterte. Kondili, tua sila dapig sa mga dautan. Sala ba ang pagpatay’g kriminal o panulay?

Ania ang tubag: Atubangan sa iyang mga tinun-an, si Hesus miingon: “Dad-a nganhi ang akong mga kaaway, kinsa dili buot nga mailaha kong hari ug patya sila sa akong atubangan.” (Lukas19:27).

Mao kini hinungdan nganong bisag unsao’g daot-saway sa mga dilawan ug sa Human Rights Commission si Duterte sa iyang war on drugs, pabilin siyang gimahal sa katawhang nakasabot-nakaila sa katarong.