Ma-langit ba mamatay sa kalami?

Gidili ang pre-marital sex sa atong Ginoo. Pero wala kini gidili sa atong gobiyerno. Walay balaod nga gipanday ang Kongreso ug Senado nga dakpon ang managhigugmaay, kinsa sa tago o sa lainlaing okasiyon, mag-pre-marital sex.

Pipila na ba ka dalaga ang nabuntis sa pasalig nga bakak? Gidakop ba? Pipila na ba ka babaye ang nahimong inahan apan dili asawa? Giposasan ba? Ug pipila na kaha ang mga naglib-in-lib-ing linalang, kinsa nakaanak na lag daghan, apan wala gihapon katultol og simbahan? Gipangpriso ba?

Gawas sa kasong rape, walay napriso sa nagsige’g pre-marital sex. Kay walay balaod sa estado nga mopahamtang og silot sa mga nag-pre-marital sex.

Kay kon duna pa, hasta mananakop ug magbabalaod gikan sa kinaubsan ngadto sa kinatas-an (hinuon dili tanan), sikoponon sab. Kini hinungdan nganong misamot kalapad ang gidaghanon sa nag-live-in partners ug nauso ang kabitkabit, one-night stand’, ‘when the price is right’ ug uban pang matang sa pre-marital sex. Hugot kining gidili sa simbahan. Pero wala gyod buhatig balaod sa kagamhanan aron unta mapugngan.

Busa, daghang dukirok bisag edaran na, tungod kay sapian, dali rang makakuhag batan-ong babaye nga ikadulog sa kama. Ug aron dili maalkanse ug maulawan, adunay imnong kapsula o tabletas para sa padugayay nga away.

Pipila kanila, namatay samtang nakighilawas sa mamords nga inday sulod sa pribadong lawak. Ang hinungdan? Parehong gi-cardiac arrest kay mitomar og pang-endurance capsule nga wala moagi o mananghid sa doktor.

Ning pipila ka adlaw nga milabay, aduna poy 59 anyos manager sa banko nga namatay samtang nakighilawas sa 24 anyos niyang girlfriend. Matud pa, kutob ra sila sa unang rawon. Kay dihang ilang gipadayon ang naputol nga ikaduhang hugna, kalit lang naglisod pagginhawa ang lalaki, na-knockout ug pag-abot sa ospital, gideklarar nga patay na.

Nasayran, nga may sakit sa kasingkasing diay kini.

Halos tanang namatay ibabaw sa kamay pinaagi sa kinawatkawat nga kalipay o pre-marital sex, sakit sa kasingkasing gyoy hinungdan. Mibuto ang ugat sa ilang kasingkasing tungod sa naghinobrang kakulba-hinam, kalalim ug kalami nga ilang gibati.

Ang pait, kay wala sila makapangandam alang sa sunod nga kinabuhi. Tukmang tubag sa pangutana: “Ma-Langit ba silang mamatay sa maong matang sa kalami?