Piniriso sa kahadlok

Mo usa  ka tuig nga nahiagum sa pandemic ang katawhan diin nagpuyo kita sa tumang kahadlok sa virus nga nawagtang ang tanan natong kagawasan sa paghimo sa gusto natong pagabuhaton tungod usab sa mga protocol nga angayan ra usab natong sundon.

Apan ang dako nga nagpugong kanato sa paglihoklihok mao mismo ang atong kaugalingon tungod sa kahadlok nato nga mataptan sa COVID-19.

Napriso kita sa pandemic sa kahadlok, samotan pa nga misaka na usab pagbalik ang kaso sa coronavirus.

Kahinumduman nga ingon usab niini nga panahon sa nakalabayng tuig nagsugod ang pagtaas sa kaso sa virus nga misangpot sa pagpatuman og community quarantine sa mga mosunod nga mga buwan.

Itandi sa pagsugod niadtong 2020, duna pay daghan kwarta ang gobiyerno nga ikasuporta sa panginahanglan sa mga tawo, aw wala man gani naigo pero karon ambot lang naa pa ba kahay nahabilin ugaling moburot na usab ang COVID-19.

Kasagaran nato naglakaw nga walay kasegurohan apan walay mahimo kay gikinahanglan man nato nga motrabaho aron mabuhi ang atong pamilya.

Gani ang uban gilingawlingaw nalang ang kaugalingon nga dili na motuo sa COVID-19 aron makaikyas sa kahadlok ilabi na kadtong walay ikasarang nga gikinahanglan manimpalad.

Luyo niining tanan gikinahanglan nato nga magpalig-on nga buhaton ang tanan aron makapadayon sa normal nga gimbuhaton.

Imbis magsige og ihap pila na ang nataptan sa COVID-19 kada adlaw, tutok nalang ta sa pagpalig-on sa atong panglawas o sa atong immune system.

Akong i-quote si Governor Gwen Garcia nga nagkanayon: “Give your body the chance to fight Covid and all other diseases, and that’s what we should focus on.

Dili nga Covid nalang gyud. Boost our immune system. Let us nurture a healthy Cebuano population moving towards economic recovery, because we are in worse shape when we talk about the economy as compared to Covid-19.”

Para nako ang sige nato og ihap sa gidaghanon sa nataptan sa COVID-19 makamugna og kalisang nga makaapekto sa emotional ug mental health sa mga tawo.

Sa probinsya sa Sugbo gihingusgan nila ang pagpang apod apod og vitamin C ug ubang mga alternatibong pamaagi pag-boost sa immune system sama sa paggamit sa mga tanom nga anaa ra sa atong palibot.

Naa naman gyud ang virus dili man na ikalimod sama sa ubang mga balatian busa mag adjust na kita unsaon pagpadayon sa atong kinabuhi nga dili magpanghadlok.

Hinuon dili pud maayo nga isipon nato nga dili tinuod ang COVID maong dili na ta motuman sa protocol. Tinuod man o dili responsibilidad nato nga panalipdan ang atong kaugalingon aron kapanalipdan usab ang mga tawo sa atong palibot.

Labaw sa tanan inanay na kitang molingkawas gikan sa pagkabanggo sa kahadlok sa COVID.