Husaya na ninyo uy

Dunay mga naninda diha sa Carbon Public Market ug mga lumolupyo sa Barangay Ermita nga nagplano na nga mopahigayon sila og martsa protesta atubangan sa Cebu City Hall.

Ang ilang iprotesta mao ang giingon nila nga dili makiangayong kontrata nga gisudlan karon sa Cebu City government tali sa Megawide, usa ka pripadong korporasyon nga motukod sa bag-ong Carbon Market.

Husto ang tambag ni Erwin Gok-ong, chairman sa Cebu Market Vendors Cooperative (CEMVEDCO), nga dili maayong mohimo sila og martsa protesta pagkakaron.

Ngano man? Anaa pa ang Coronavirus Disease ug basin unya makalapas sila sa health protocols nga gilatid sa Inter-Agency Task Force (IATF) nga likayan gyud ang panagpundok sa mga tawo.

Nakadayeg ko ni Gok-ong nga mihimo sa maong tambag, ug mitambag siya nga kon dili gyud maminaw kanila ang mga opisyal sa Dakbayan sa Sugbo, modangop ra sila sa korte o kaha sa Ombudsman.

Nabasa nako sa mga post ni Gok-ong diha sa social media nga nahimangod ang mga naninda sa Carbon Market kay wa gyud sila gikonsulta ug wala sila pahibaw-a sa tanang detalyi kabahin sa kasabotan sa siyudad ug sa Megawide.

Karon, gikataho nga gihatagan na sa siyudad og Notice to Proceed ang Megawide aron makasugod na pagmugna sa modernized Carbon Market nga gihulagway ni Gok-ong nga mabentahaan ang siyudad.

Kon ako’y kuhaan og pamahayag, gusto nako nga tin-awon gyud kining maong isyu kay duna ra bay mga nagduda nga gidali-dali kini nga proyekto bisan og nabentahaan ang City Hall kay dunay nakadawat og kaayohan.

Gipasabot ko ni Gok-ong nga sa Joint Venture Agreement nga gipirmahan sa mga opisyal sa siyudad ug sa Megawide, gilatid nga adunay grupo nga gitawag og Oversight Committee.

Sila maoy magmugna og mga pamaagi kon unsaon pagpadagan ang modernized Carbon Market nga pagatukoron sa Megawide.

Matud ni Gok-ong nga pito ang mga sakop sa Oversight Committee ug tulo gikan sa Cebu City government ug ang upat sa Megawide.

Sa ato pa, kon dunay mga sugyot, kanunay’ng pilde ang mga representante sa Dakbayan sa Sugbo kay lupig man sila sa numero?

Bisan pa og ibutang nato nga ang representante gikan sa City Hall maoy mag-chairman sa Oversight Committee, lupig gihapon sila kay upat man ang gikan sa Megawide. Nasabtan ba ninyo?

Matud ni Gok-ong nga gipatawag man tuod sila sa pipila ka tigum, apan wa diay sila masayod nga naglihok na ang papeles ug gipirmahan na gani diay bisan wala pa sila makabasa sa kinatibuk-an nga kasabotan.

Para kanako, angay gyud nga dili tago-tagoon sa mga opisyal sa City Hall ang maong Joint Venture Agreement tali sa Megawide.