EDITORYAL - Tree planting

Usa ka maayong ideya kining paghimong rekisitos sa mga buot mosulod sa kaminyoon nga kinahanglang mananom una sila og mga punoan sa kahoy ayha pa hatagan og marriage license.

Para sa uban ideya palang kini, apan sa Danao City dinhi sa Sugbo gisugdan na kini sa miaging tuig ug maayo ang resulta. Gani karon, aduna nay 231 ka mga punoan sa mga kahoy nga nitubo sa palibot sa City Hall nila karon. Dili lang basta kahoy, kondili mga tanom gyud nga mamunga ang gipatanom kanila.

Sa Danao City, dili mahatagan og marriage license ang mga buot magpakasala kung dili sila makadala og semilya sa punoan sa prutas, o tanom nga mamunga aron makaon sa tawo.

Kay isip magtiayon sa pagdagan sa panahon makabaton man gyud og mga anak ug magkapamilya sab hangtud sa mosunod pang mga henerasyon.

Kining mga bag-ong kinabuhi mapuno man kini sa populasyon nga mokonsumo sab sa resources sa kalibotan, gikan sa hangin, pagkaon, ug uban pa.

Dili naman kini bag-o, tungod kay gihimo naman kini kaniadto sa mga karaang tawo. Dili tungod kay rekisitos kondili gusto gyud nila mananom para sa ilang mga umaabot nga mga anak ug mga apo. Busa, maisip nga ang gitanom sa mga bag-ong magtiayon pangandam kini para sa ilang umaabot nga mga anak ug mga apo ug mosunod pang mga henerasyon.

Subo lang nga samtang nagka-moderno ang panahon nagkaanam na og kawala sa tawo ang hilig sa pagpananom, dala sa nalubong sa limot ang ilang obligasyon pagtudlo sa mga kabataan kabahin sa kamahinungdanon sa pagpananom.

Angay sab unta kining buhaton sa ubang mga local government units, tungod kay dili man tingali ikalain sa mga buot magpakasal kun patamnon sila ayha hatagan og marriage licenses. Maayong pakpakan ang Civil Registry Office sa maong siyudad tungod sa gihimong inisyatiba kay para kini sa kalikopan.

Ang gihimo sa maong buhatan makabenepisyo og dako ang taga Danao mismo gikan palang sa pagpugong sa pagdahili sa yuta, pagbaha, pagsigurong dili maughan sa tubig ang siyudad ug labaw sa tanan, preskong hangin tungod sa labong unya nga mga punoan sa siyudad.