Himsog ang mayor

Dugay na nga mikatap ang isyu mahitungod sa kahimtang sa panglawas ni Mayor Edgardo Labella.

Nagsugod ang isyu nga dunay seryosong balatian ang mayor tungod sa mga hulagway atol sa mga kalihokan nga iyang tambongan diin makita nga daw sa nanlagom ang iyang mga tudlo ug nanghupong.

Gihimakak na sa mga opisyal sa City Hall ug sa mayor mismo nga duna siyay seryosong balatian.

Gawas sa gall stone nga malamposon na nga naoperahan, matud sa mayor nga maayo ang kahimtang sa iyang panglawas.

Hinuon admitido siyang tungod sa pangidaron duna siyay pamation apan dili kini hulga sa iyang kinabuhi.

Apan niadtong Domingo misibaw og maayo ang tabi-tabi nga seryoso ang kahimtang sa panglawas sa mayor human wala siya makatambong sa mga kalihokan sa Sinulog.

Gani gidungog pa nga na coma ang mayor. Ambot kinsay nagpasiugda sa tsismis, apan hinaut hunongon na ang pagpanunglo sa mayor.

Taliwa niining krisis nga atong giatubang karon dili makatabang ang pagpanungo sa atong mga opisyal.

Hinunoa angayang iampo ang atong mga opisyal nga hatagan og kalagsik ug maayong panghunahuna aron maatiman ang problema nga atong gisagubang.

Wala ma m-coma ang mayor, gani nagpa-interview siya sa dySS kagahapon uban ni Super Bobby Nalzaro.

Matud sa mayor nga ang hinungdan nga wala siya makatambong sa kalihokan sa Sinulog niadtong Domingo mao ang infection sa iyang dunggan.

Gikinahanglan hinuon sa mayor ang pahuway sulod sa duha ka adlaw busa si Bise Mayor Michael Rama maoy magsilbing acting mayor samtang on leave si Labella.

Ug aron mahunong na sab ang mga isyu sa panglawas sa mayor, mas labing maayo nga ipakita niya ang iyang medical records aron masayran sa publiko.

Angayang hinumduman sa atong mga opisyal nga ang kahimtang sa ilang panglawas usa ka public issue nga dili angayang ibaliwala.