Kasikas sa politika

Sibaw na kaayo karon ang mga estorya kon kinsa ang molansar pagka presidente ug bise presidente nga gustong mopuli kanila ni Presidente Duterte ug Vice President Leni Robredo.

Ang popular kaayo mao nga duna kuno’y posibilidad nga si Davao City Mayor Sarah Duterte-Carpio maoy mopapili aron pulihan ang iyang amahan kon modaog sa eleksyon unya sa 2022.

Matud pa nga posible nga si kanhi Senador Bongbong Marcos maoy magbise, apan matud pa nga mahimong balit-ad sab ang mahitabo, nga si Bongbong ang mag-presidente ug si Inday Sarah ang mag-bise.

Ambot og tinuod ba nga si kanhi senador Chiz Escudero, kanhi vice president Jejomar Binay, Senador Panfilo Lacson wa nay tinguha nga mag-presidente.

Apan mitumaw usab ang mga tabi-tabi nga may posibilidad pa gani nga si Senador Manny Pacquiao magpapili usab pagka presidente.

Pagka vice president, sibaw usab ang mga tabi-tabi nga dunay posibilidad nga modagan si Senador Win Gatchalian nga taga Luzon.

Ang akong nadunggan nga si Chiz Escudero, Loren Legarda, ug bisan si Leni Robredo mora’g mobalik na lang sa Senado. Aw, diha hinoon sa Senado dili kaayo dako og kahago.

Basta kay bana-bana nako, alegre gyud kaayo ang eleksyon karong sunod tuig, ilabi na nga ang pag-file sa mga Certificates of Candidacy himoon na sa hinapos ning tuiga.

Atong paabuton kon unsay kalamboan sa kalihokan sa politika sa atong nasud.

* * *

Sa politika sa lokal, wa pay klaro kon si kanhi mayor Tomas Osmeña makigtigi pa pagbalik kang Mayor Edgar Labella dinhi sa siyudad.

Sa birthday party ni Kongresista Bebot Abellanosa, nadunggan si Osmeña nga iyang  gikomedyahan si Bebot nga mag-ilis sila og pwesto, ug siya maoy adto sa south district.

Ambot og unsa kaha ang mahitabo kon si Vice Mayor Mike Rama modagan sab pagka mayor, kay mabuak man ang botos nga para kanila ni Labella.

Nagpasabot nga kon magdungan sila si Labella ug Rama nga magpapili pagka mayor, magkatawa si Osmeña. Huwat lang ta sa kalamboan.

* * *

Makahimo gani mo’g sala unya madakpan mo, ayaw’g ikyas kay sigurado gyud mo nga mamatay, ilabi na og mosukol.

Sa programa nako sa radyo kaniadtong Huwebes sa gabii, gisibya nako nga si Mark Muralde nga nadakpan tungod sa paghupot og shabu, gidala didto sa Cebu City Medical Center, apan miikyas.

Gipangita sa kapolisan si Muralde ug nakit-an siya didto sa lungsod sa Daanbantayan, ug kay misukol man kuno, aw patay.

Kamo nga naghunahuna nga moikyas gikan sa mga “kamot sa balaod,” hunahunaa pag-ayo nga labing siguro patay gyud mo kon makit-an kay maghatag man mo’g problema sa inyong giikyasan.