Si Sir John

Ning pipila ka mga adlaw nga milabay nahimong sentro sa akong pamalandong dinhi ang mga personahe nga nalambigit sa akong kinabuhi.

Dili pa lang dugay, akong natagik ang babaye nga ginganlan og Letecia Canoy. Karong mga panahona ako na pud i-special mention si Sir John o Tay Juan alang sa kadaghanan.

Kini si Sir John nailhan pud sa angga nga master. Kini kay siya may tingog ug gawas nga may tingog bisan pa man sa iyang katigulangon siya molihok sa gihapon alang sa Parokya sa Catmon.

Suod nako si Sir John ug gani may utang kabubut-on pud ko niining tawhana. Sa panahon sa akong Canta Misa kaniadto, siya gyud ang maisip nakong nangulo.

Hilig og perfection si Sir John dili tungod kay buot siyang daygon kondili alang niya ang imong bulohaton bisan unsa pa siya kagamay ang mosalamin man gyud sa imong kaugalingon. Mao nga seguroha gyud nga husto ang imong pagabuhaton.

Daghan ko og nakat-onan kang Sir John, ilabina kun maghisgot kita og planning. Daghan ko og nakat-onan, ilabina kun maghisgot kita og tumong.

Daghan ko og nakat-onan, ilabina kun maghisgot kita og pangalagad. Kuyog ni Tatay Sin silang duha nagbudlay alang sa kaayohan sa tanan.

Halos tibuok niyang kinabuhi iyang gihalad alang sa kahitas-an ug sa simbahan.

Nagmanggihatagon siya ug nahimong makanunayon diha sa iyang panerbisyo hangtud sa katapusan niyang gininhawa. Salamat Sir John sa imong kaayo ug pagpangga.

Daw sama ikaw sa usa ka amahan nga kanako maminaw kaniadto kun anaa ako sa mga kalibog. Sa mga higayon nga ako daw magdumili pagdawat sa tahas nga gisangon kanako ,ikaw sa kanunay modasig ug momaymay.

Kanunay nimong giingon kanako: “Dili sa tanang higayon hayahay ang kinabuhi! Moagi ra gihapon ka ana!” Sayud ka sa akong sugilanon ug nibati ka sa akong kahimtang.

Gibuhos nimo ang imong amahanong paggiya labina niadtong mga higayon nga mao pa lay pagsugod nako sa akong panaw sa kinabuhing parianon.

Salamat sa paghimo niadto nga halandumon. Tinuod ang Dios maoy magbuot sa tanan apan ang paghimo sa matag detalye nga makahuloganon mag-agad usab sa paagi nga kini atong gambalayon.

Kun asa ka man karon, padayon ka namong handumon. Ug sanglit ikaw man ang master nga maayong mogambalay og mga laraw, giyahi kami sa pagpangandam usab sa among tagsa tagsa ka mga pagpanaw!

Pahasubo sa banay nga Concha! Adiyos kanimo Sir John! In Pace Requiescat! Sayud ko nga dinha matagamtaman mo ang kahingpitan uban sa atong Langitnong Amahan ug ni San Guillermo nga Bulahan!