Nahadlok sa sayd-epek

Nagkadaiya ang reaksiyon sa mga senior citizens ngadto sa bakuna batok COVID-19 tungod sa balita nga adunay nangamatay didto sa Norway human mabakunahan. Kasagaran kanila mipadayag nga dili na magpabakuna tungod sa mga side effects niini.  Adunay pipila nga mopasiatab nga dili mahadlok mamatay, apan adunay panultihon nga “Walay gusto mahimutang sa lugar kon asa ug kanus-a mahitabo ang kamatayon”. Luyo sa kahadlok, ginaingon usab nga, “maanyag sud-ongon ang kamatayon basta dili lang pinaagi sa usa ka aksidente”. Baya no!

Isagol sa beer ang bakuna

Sa susama’ng balita, naningkamot usab karon ang kagamhanan sa nasud sa India nga mosaka ang pagsalig sa ilang katawhan sa programa sa pagpamakuna batok sa COVID-19. Nasayran nga daghan ang wala mosanong sa ilang kampanya bahin sa bakuna.  Dili kahibudngan ang reaksyon sa katawhan..  Gisaway pa man gani ang “TUOB” dinhi sa ato bisan sa iyang pagka-traditional, ang COVID vaccine pa kaha nga bag-o pa lang naimbento ug aduna pa’y gibaniog nga dautan’g epekto.  Maayo tingale isagol ang bakuna sa beer.  Sure na!

Way klaro nga polisiya

Mipasidaan si Agriculture Secretary William Dar nga pasakaa’g kaso kadtong mga magpapatigayon nga nagmanipula sa suplay sa mga utanon ug ubang lagutmon hinungdan sa padayon’g pagsaka sa presyo sa maong palaliton.   Makalibog ang polisiya sa DA. Balaod sa “Supply and Demand” man ang modominar sa merkado. Sa miaging tuig bitaw diin nagkalata ang suplay sa utanon ug gipanglabay na lang gani, wala mobakyaw ang DA sa ilang kamot ug buot pa’ng paundangon pagpananom ang mga mag-uuma.  Karon nga nagnihit ang suplay, ikiha na pud hinuon sa DA ang mga negosyante.  Pag-chure uy!

Weder-weder lang

Gisaulog ni’ng bag-o lang ang ika-75 nga anibersaryo sa katukoran sa Partido Liberal (LP) diin gitawag kini ni Senador Drilon ang LP nga partido nga nagadala sa tingog sa katarungan ug sa tingog sa mga walay timik sa katilingban.  Mahimo’ng dawaton ang giingon nga tingog sa katarungan apan kaduha-duhaan ang giingon nga tingog sa mga walay timik. Labing nag-una nga kritiko karon sa administrasyon ang maong partido. Ang LP usab ang nagbansiwag sa mi-aging administrasyon. Kabahin sa gawasnong pagpadayag ang gipamulong sa Senador. Isip politiko, sayod siya nga ang tawo nga mikulismaot sa gipamulong niya karon, mahimong mopakpak sa samang mga pulong ugma.  Weder-weder ra!

Wagtangon ang clearance?

Mipasidaan ang kagamhanan sa dakbayan sa Sugbo ngadto sa publiko kabahin sa mga binuhat nga namaligya ug mga peke nga “travel clearances”.  Matud pa ni Konsehal Garganera, EOC deputy chief implementer, aduna na’y nasakpan niining maong binuhatan.  Matud pa sa akong amigo, sayon ra sulbaron ang maong suliran, Ang iyang sugyot: “Wagtangon na ang ‘travel clearance’ aron matibway”.  Pagkatoytoy!