Tiyabaw sa mga Sto. Niño vendors

Temporaryong gibalhin sa kilid sa Maritima building ang mga mamaligyaay og imahen sa Senyor Sto. Niño tungod usab sa kalihokan sa kapistahan sa dakbayan sa Sugbo.

Apan nitiyabaw sila tungod kay apektado man kaayo ang panginabuhian sanglit mingaw  ug tuyoon ang dapit. Nisamot ka mingaw dihang gikanselar ang public novena mass sa Basilica del Sto. Niño kay wala namay mga tawo nga masaag sa ilang pwesto.

Bentaha sa dihang duna pay public mass kay naay magbitbit og mga imahen dayon mohapit sa ilang tindahan aro pailisan og bisti ug ipaayo ang korona.

Kagahapong adlawa atol sa akong pakighinabi nila, wala kapugni sa mga tindera nga mihilak nga misaysay sa ilang kahimtang.

Ang usa vendor miingon nga naa siyay bana nga masakiton ug gikinahanglan nga tauran og oxygen kada adlaw nga mogasto sila og P700, sa sitwasyon nila karon nahadlok siya unsaon pag survive nila.

Kasagaran sa ilang puhonan inutang with interest hinungdan nga nabalaka sila nga dili na makautang og sunod kong mapakyas sila sa paghatag sa ilang obligasyon. Panawagan nila sa mga suki nga tultolon sa ilang bag-ong nahimutangan o ba kaha ibalik sila sa ilang naandan nga pwesto kay wala naman ang public mass sa basilica.

Apan wala pay kasegurohan kong makabalik ang tanan ilabi na nga dunay kamandoan ang DILG sa paghawan sa mga estraktura sa daplin sa karsada.

Hinuon gipasalig man ni Mayor Edgardo Labella nga dunay win-win solution ang syudad sa sitwasyon sa mga vendors, kong unsa wala pa niya ibutyag.

Huwaton nalang nila kong unsa kini tungod kay ang gitan-aw man usab sa syudad ang kaayohan sa katawhan.

Ugaling dili pa sila makabalik sa kilid sa basilica, kinahanglan tabangan sila pag-promote sa ilang nahimutangan aron matultolan ug maanad ang mga tawo sa kadugayan. Sa sinugdanan hinay gyud ang kita apan sa ngadtongadto motultol naman ang mga tawo kay nasayod naman sila sa bag-ong pwesto.