Sa simbahan o pinuy-anan anaa kanunay ang Senyor Sto. Niño

Nahimong init nga diskusyon kaniadto kong angayan pa himoon o dili ang cultural presentation sa Sinulog 2021, apan mipatigbabaw gyud ang paghatag og bili sa kaluwasan sa katawhan niining panahon sa pandemiya.

Hingpit nang gipadaplin sa Sinulog Foundation Incorporated ang pagpahigayon sa performance sa mga contingents karong tuiga sa ilang virtual platform sa Enero 17.

Ang ipasalida sa SFI online portal mao ang mga best of Cebu apil na ang rewind performances sa mga nangaging winners sa Sinulog Festivals.

Ang desisyon sa SFI nakab-ot gumikan sa kabalaka ug kahadlok sa katawhan nga molipang ang coronavirus ilabi na nga nagsaka na usab ang kaso sa COVID-19 sa dakbayan sa Sugbo.

Maayo gani nga naminaw ang SFI sa pulso sa katawhan nga supak sa nahaunang tinguha nila nga 99 porsiyento nga virtual presentation.

Bisan og i-record sa mga tagsatagsa ka barangay ang performance sa mga contingents apan delikado gihapon kay naa man gihapoy physical contact ang mga participants panahon sa ilang practice ug mismo sa recording.

Dili pa uwahi ang tanan bisan pa og nakapatahi na seguro sa ilang mga costume ug nakagasto na bahala na basta maseguro lang ang kaluwasan.

Pero unsa man ang kalainan sa cultural ug sa religious activity sa Sinulog?

Naa man usay mass gathering sa mga manimbahay bisan og  gipatuman ang health protocol dili gihapon maseguro nga walay magtinakdanay.

Gani usa sa klaro kaayong kalapasan nga nahimo sa mga deboto ang dili pagsul-ob sa mga face shield. Tinuod naka mask ang tanan ug naa puy dala nga shield apan wala gamita, gihimong head shield.

Sa pag-cover nako, nakita nako nga kutob ra gyud sa ulo ang shield compliance lang aron matugotan nga makasimba.

Kompiyansa na kaayo ang mga tawo tungod kay daghan na ang dili motuo og COVID-19, o ang uban gisalig ang tanan sa hugot nga pagtuo. Sakto man nga mosalig kita sa Ginoo apan ubanan usab nato sa pag-amping.

Dili nato ipugos ang gusto nato nga mahitabo kay ang kamatuoran delikado pa gyud mosagol sa daghang mga tawo kay basin usa kanila adunay dalang virus.

Naay online mass nga maoy gidasig sa kadagkoan sa simbahan nga mahimo ra kita motambong niini bisan og naa ra kita sa balay.

Makasabot ra ang Balaang Bata nga dili makaadto personal sa Basilica tungod kay anaa man siya kanunay nag uban kanato sa atong kasingkasing ug sa atong pagkatawo.

Ma-anaa man kita sa simbahan o sa atong pinuy-anan, ang Senyor Sto. Niño nagauban kanato.