EDITORYAL - Pagkatapos sa DPWH, sa BIR naman ang sibakan
MABABAWASAN na ang katiwalian sa Department of Public Works and Highways (DPWH) ngayong marami nang sinibak na district engineers. Ang mga korap na engineers na ito ang dahilan kaya pawang palpak ang mga proyekto ng gobyerno. Malaki ang kickback ng mga ito at kinukutsaba pa ng mga korap ding kongresista. Kamakailan pinangalanan ni President Duterte ang mga kongresista na sangkot sa anomalya sa DPWH.
Sa pagkakasibak sa 14 na district engineers, nagliliwanag na ang landas at maaring matupad na ang pangarap ni President Duterte na iiwan niyang malinis na malinis ang mga tanggapan ng gobyerno. Noong nakaraang Nobyembre, sinabi ng Presidente na bago siya bumaba sa 2022, titiyakin niyang malinis na malinis sa korapsiyon ang lahat nang tanggapan. Makaaasa raw ang mamamayan sa kanyang pangako.
Harinawa ay magkaroon ng kaganapan ito. Nagsasawa na ang taumbayan sa mga pangako ng namuno sa bansang ito at ang nais naman nila ay mamuhay na ligtas sa mga gutom na “buwaya”.
Matutuwa ang mamamayan kung ang mga korap naman sa Bureau of Internal Revenue (BIR) ang sunod na sisibakin ng Presidente. Ang BIR ay pumapangalawa sa DPWH sa grabe nang nangyayaring korapsiyon. Sunod sa BIR ang Bureau of Customs at sinundan naman ng Bureau of Immigration.
Kamakalawa, inatasan ni President Duterte si BIR Commissioner Caesar Dulay na isumite sa kanya ang listahan ng mga opisyal na sangkot sa anomalya. Ayon sa Presidente, rerebyuhin niya ang listahan ng mga opisyal na sangkot sa iregularidad. Hindi naman sinabi ng Presidente kung babasahin niya ang pangalan ng mga opisyal na sangkot sa muli niyang pag-uulat sa bayan sa susunod na linggo.
Maraming korap sa BIR. Karamihan sa mga ito ay mga examiner. Namumutiktik sa pera ang mga “buwayang” examiner. Kapalit nang malaking halaga, sila ang ‘‘nag-aayos’’ ng papel ng mga delinkuwenteng taxpayers. Milyon ang usapan para maisaayos ang mga hindi nabayarang buwis.
Kung marami ang natuwa sa pagkakasibak sa mga korap sa DPWH, mas marami ang matutuwa kapag nalipol ang mga korap sa BIR. Nararapat nang linisin ang BIR sa mga hayok na “buwaya’’. Panahon na para mabitag ang mga ito at itapon sa kulungan.
- Latest
