Ang pagsunod sa lagda sa gobiyerno mao ang pagsunod sa Ginoo

Karong adlawa ang pagbukas sa kapistahan ni Senyor Sto. Niño pinaagi sa Novena Mass diha sa Basilica del Sto. Niño. Lahi kini sa naandan kay simple ra itandi kaniadto nga naay Walk with Jesus nga manukad sa Fuente Osmeña hangtod na sa Basilica.

Ang tanan 180-degree nga nausab tungod sa pandemiya, apan ang tanan malaumon nga subli natong masinati ang kanhiay nga kalihokan pinaagi sa hugot nato nga pagtoo sa Batang Hesus. Higpit nga seguridad ang gipatuman sa sulod ug gawas sa Basilica diin naka-deploy ang kapolisan ug mga multiplier forces aron maseguro nga mapatuman gyud ang health protocols.

Dunay yellow marker nga maoy tungtongan sa mga deboto, first come first serve ang systema kadtong makauna maoy mapahimutang kadtong mauwahi pasensya nalang.

Hinuon dunay mga dagkong monitor sa gawas ug sa mga Plaza sa dakbayan nga pwedeng didto lang ang mga deboto mamati sa misa aron malikayan ang tapok tapok.

Gimandoan usab ang mga baranggay nga mag-live streaming aron dili na molugsong pa ang mga tawo sa simbahan.

Makasabot ra gyud ang Balaang Bata sa sitwasyon nga dili makaadto sa basilica kay kabahin kini sa pag amping nato sa atong kaugalingon ug sa mga tawo nga naglibot kanato.

Dili nato malalis ang uban nga adunay panaad busa mamasin nga makaduol gyud sa Basilica busa gikinahanglan nga magsakripisyo moadto og sayo aron makaplastar.

Samtang dili na nato gikinahanglan nga pahinumdoman pa sa mga otoridad sa mga angayan ug dili angayang buhaton kay kita mismo nakabalo na.

Mas nasayod kita sa makaayo nato ug sa dili busa ampingan nato ang atong kaugalingon aron dili kita makaamong sa uban simbako lang.

Sakit tinood sa buot nga dunay dagkong babag sa atong tinguha karong panahona apan kining mga babag maoy manalipod kanato gikan sa peligro.

Sa pagsugod sa Novena Mass unta atong  iampo dili lang ang personal natong katuyoan kon dili ang kinatibok-an nga kaayohan natong tanan. Pulos kita nakaangkon og injury sa emotional ug mental tungod sa kalisang sa COVID-19 pero kaya ra natong tanan basta mosunod kita sa atong gobiyerno kay mao kini ang timailhan sa pagsunod nato sa Ginoo.