Wine of death

Gidili ang pagpahigayog party sa miaging Pasko ug Bag-ong Tuig.

Apan sa usa ka hotel sa Makati, si Christine Angelica Dacera kuyog sa mga kaubang bayot, kinsa sama niya, flight stewardess sab sa Philippine Airlines, mi-check-in aron sila mag-party agig pagsugat sa Bag-ong Tuig 2021.

Matud pa, upat lamang silang magbarkada ang nagsabot.

Pero, pagsugod nilag selebrar, may laing mga gays ug bi-sexual nga nangabot, kinsa gitawagan-imbitar sa mga kauban ni Christine.

Pagka alas 12:30 sa buntag, Enero 1, 2021, nakatawag pa pinaagi sa selpon si Christine sa iyang Mama, kinsa nangutana hain siya niadtong tungora ug si kinsay iyang mga kauban?

Malipayong mitubag-pahibalo ang guwapang anak, nga naa siya sa usa ka hotel sa Makati kuyog sa iyang mga barkadang bading, kinsa kauban ra niyag trabaho aron sila mag-year end party.

Apan paglabay sa pipila ka oras, gipahibalo ang inahan sa usa sa mga higala ni Christine, nga si Christine patay na.

Ug sa wala pa mamatay si Christine, nakasulti pa kuno nga ingon sa adunay something gibutang sa binong nainom, diin maoy nakapaluya-awop sa panan-aw sa dalaga.

Ug misangpot sa wala nay sininang Christine sulod sa naghayang bath tub nga nagsapnay kaniyang wala nay kinabuhi.

Base sa pasiunang pangdukiduki sa kapolisan, nasayran nga may semeng nag-umog ilawom sa iyang gihay.

Timailhan, nga sa 11 ka bading gikauban sa panag-inom og bino ni Christine, usa o pipila kanila miabuso-patong kaniya. Posible ba kini? Nga, pulos man bayot iyang gika-bonding-bonding? Nganong dili?

Among bartender bayot kaayo. Pero naka-lima ka anak sa iyang gikalib-ing babaye. Ikaduha, sa kaguwapa-kalamig lawas ni Christine, kinsang bayota ang dili mahimong pyur lalaki?

Unta, kining maong hitabo makahatag og leksiyon sa kadalagahang hilig makigbarkadag bayot. Kay bisan si Hesus, gibudhian-baligya man gani sa usa sa Iyang mga apostoles, unsa na kaha niining mga linalang nga gustong usbon ang unsay gihatag sa atong Magbubuhat kanila?

Hinuon, dili pa matumbok ang tinuoray’ng nag-among-among ni Christine. Kinahanglang pa kinig imbestigasyong halawom. Medyo, may kalubog pa ang kintatibuk-ang senariyo.

Usa ra ang tin-aw kaayo. Kadtong butang nga gisekretog sagol sa usa ka Hudas, didto sa binong giinom ni Christine – ang bino sa kamatayon.