Nganong di magpa-imbestigar
Kay maglisod man pagpasabot giunsa pagpayuhot ang bakuna sa Sinopharm sa China nga wa pay pagtugot sa Food and Drug Administration (FDA) sa Pilipinas ug nganong nabakunahan ang mga sakop sa Presidential Security Group (PSG), Armed Forces of the Philippines (AFP) ug gabinete, nideklarar ang Malakanyang nga di sila magpa-imbestigar sa Senado.
Nipasidaan og krisis si Presidente Rodrigo Duterte kon pugson sa pagpaatubang sa mga senador pinaagi sa supina si PSG chief Brig. Gen. Jesus Durante III. Siya ang nibisto sa ilegal nga pagpamakuna apan nasuko human gipangayoan og detalye.
* * *
Kay di man mangahas ang mayoriya sa Senado sa pakigbangga sa presidente (nilikoy dayon si Senate President Tito Sotto nga gi-intriga ang presidente kay wa diay silay plano sa pagsupina ni Durante), mabawo ang tanang naglaom nga may mahimo nga matinud-anong pakisusi.
Kay ang gitugotan ra sa Malakanyang nga makapangimbestigar mao ang National Bureau of Investigation (NBI) ug FDA nga pulos under the bunal sa buhatan sa presidente. Bisan ang AFP, nga magsugod na unta karong semanaha sa ilang imbestigasyon sa PSG, nikakak dayon human sa pasidaan sa presidente.
* * *
Ang atong masaksihan mao ang pingis-pingis nga imbestigasyon. Kay ang mapatawag sa mga senador mao ra man ang mga opisyal nga di duphan sa presidente. Mahimong masabonan ang Bureau of Customs (BOC) ug ubang tigbantay sa mga pantalan ug tugpahanan.
Apan way makapanghilabot sa PSG. Karon pa lang wa nay naghisgot sa nabakunahang mga sakop sa gabinete (suma sa pangangkon ni Interior Secretary Eduardo Año) ug mga sundawo (suma sa kumpisal ni Philippine Army Chief Lieutenant General Cirilito Sobejana).
* * *
Laing makapa-alarma nga kasayuran nga mahimong susihon sa mga senador mao ang nabutyag nga pagpamakuna sa 100,000 ka taga mainland China nga mga kawani sa Philippine Offshore Gaming operations (POGOs). Ug nga ang tinubdan mao say nanghatag sa mga bakuna alang sa PSG, AFP ug gabinete.
Nahitabo ning mga palusot sa wa pa makaabot dinhi ang P75 bilyones nga balor sa mga bakuna alang sa labing nagkinahanglan nga mga Pilipinhon. Mangandam na lang tang daan sa mas makauuwaw nga mga paugat sa mga alyado sa pamunoan ni Presidente Duterte nga determinadong manguwarta sa pandemya.
- Latest
